සිංගප්පුරු නිදහස් වෙළඳ ගිවිසුම යටතේ ආනයනය කෙරෙන භාණ්ඩ රැසක බදු අඩු කිරීමට රජයේ මුදල් පිළිබඳ කාරක සභාවේ අනුමැතිය හිමිව තිබේ.

ඒ රේගු ආඥාපනත යටතේ, 2023 ජූනි 30 වන දින අංක 2338/54 අති විශේෂ ගැසට් පත්‍රය සාකච්ජාවට ගත් අවස්ථාවේදීය.

ඒ යටතේ 15%ව පැවති බදු ගාස්තු 5% දක්වා අඩු කිරීමට යෝජනා කර ඇත.

ඒ සඳහා අනුමැතිය ලබාදෙමින් කමිටුව නිලධාරීන්ගෙන් ප්‍රශ්න කළේ මෙම වෙළඳ ගිවිසුම මගින් මෙරටට ලැබෙන ප්‍රතිලාභ මොනවාද යන්නයි.

ඊට පිළිතුරු ලබා දුන් නිලධාරියකු ඒ පිළිබඳව ශක්‍යතා අධ්‍යනයක් සිදුකිරීමට නොහැකි වු බව පවසා තිබේ.

ඒ පිළිබඳව කාරක සභා සභාපති ආචාර්ය හර්ෂ ද සිල්වා සිය අප්‍රසාදය පළකරමින්, සිංගප්පුරු වෙළඳ ගිවිසුම හා කටයුතු සිදුකරන ප්‍රධාන නිලධාරියාට මෙම ගිවිසුම පිළිබඳව තාර්කාණුකූලව කරුණු ඉදිරිපත් කරමින් සති 6ක් තුළ වාර්තාවක් කමිටුවට ලබා දෙන ලෙස නියෝග කර ඇත.