නව රජය සියලුම විදේශීය රටවල් සමඟ සබඳතා සමතුලිත කිරීමේ දී ඔවුන්ගේ සමතුලිත කිරීමේ ක්‍රියාවේ විශේෂ අවධානය යොමු කළ යුතු රටවල් දෙකක් ලෙස ඉන්දියාව සහ චීනය අවධානයට ලක්ව තිබේ.

මෙම රටවල් දෙකම පරම්පරා ගණනාවක් තිස්සේ ශ්‍රී ලංකාව සමඟ සමීප රාජ්‍ය තාන්ත්‍රික සබඳතා පවත්වයි.

එකිනෙකා සමග එදිරිවාදිකම් නොමැතිව සිටීමට නම්, ශ්‍රී ලංකා නායකයන් විසින් රටවල් දෙකම සංවේදීව හැසිරවිය යුතුව ඇත.

චීනයේ පර්යේෂණ යාත්‍රා ශ්‍රී ලංකා මුහුදු සීමාවට ඇතුළුවීම මෑත වසරවලදී අමෙරිකා එක්සත් ජනපදය සහ ඉන්දියාව වැනි රටවල දැඩි කණස්සල්ලට හේතු වී තිබිණි.

පසුගිය වසරේ රනිල් වික්‍රමසිංහ පාලනය චීනය සමඟ දැඩි රාජ්‍ය තාන්ත්‍රික සබඳතාවලට මුහුණ දුන්නේ පර්යේෂණ යාත්‍රාවලට මෙරට මුහුදේ සංචාරය කිරීමට අවසර දෙන ලෙස චීනය කළ ඉල්ලීම ප්‍රතික්ෂේප කිරීමෙන් පසුවය.

කෙසේවෙතත්, සති කිහිපයකට පසු, හිටපු රජය ජර්මානු පර්යේෂණ නෞකාවකට ශ්‍රී ලංකා මුහුදු සීමාවට ඇතුළු වීමට අවසර දුන් අතර, බීජිං ප්‍රතික්ෂේප කර ජර්මානුවන්ට අවසර දුන්නේ මන්දැයි චීනය එවක විදේශ අමාත්‍යාංශයට දැඩි විරෝධයක් එල්ල කළේය.

මෙම සිදුවීම චීන සමාජ මාධ්‍ය ඔස්සේ කෙතරම් පුළුල් ප්‍රචාරයක් ලබා ගත්තේද යත්, පසුගිය මාසයේ කොළඹදී මාධ්‍යවේදීන් සමඟ පැවති සාකච්ඡාවකදී චීන තානාපති Qi Zhenhong කියා සිටියේ හිටපු රජයේ තීරණය සම්බන්ධයෙන් චීන ජාතිකයන් කලකිරීමට පත්ව ඇති බවයි.

මෙම රාජ්‍ය තාන්ත්‍රික කරුණු නිසා ශ්‍රී ලංකාවට පැමිණෙන චීන සංචාරකයන්ගේ පැමිණීම ද අඩු වූ බව තානාපතිවරයා ප්‍රකාශ කළේ ශ්‍රී ලංකාවේ හැසිරීම පිළිබඳ චීන ජනතාව කලකිරීමෙන් සිටින බව ප්‍රකාශ කරමිනි.

චීන පර්යේෂණ යාත්‍රා කොළඹට පැමිණීම ප්‍රතික්ෂේප කරන ලෙස ශ්‍රී ලංකාව බලපෑම් කළේ කාගේ උපදෙස් මතද යන්න පැහැදිලි බවද ඔහු ප්‍රකාශ කළේය.

ශ්‍රී ලංකා නායකයන් අන්තර්ජාතික බලපෑම්වලට යටත් නොවිය යුතු බවත් ස්වාධීන විදේශ ප්‍රතිපත්තියක් පවත්වාගෙන යා යුතු බවත් චීන නියෝජිතයා ප්‍රකාශ කළේය.

දැන් ජාතික ජන බලවේගය ආණ්ඩුව බලයේ සිටින විට, දෙරට අතර සබඳතා සමාන මට්ටමක පවතින බව සහතික කිරීම සඳහා ඔවුන් සුපරීක්ෂාකාරීව කටයුතු කළ යුතුය.

ඊයේ පස්වරුවේ ඇමැති මණ්ඩල ප්‍රකාශක වෛද්‍ය නලින්ද ජයතිස්ස කියා සිටියේ සංචාරයේ අරමුණ සළකා බලා ආරක්ෂක මණ්ඩලයේ සහතිකය මත විදේශීය පර්යේෂණ යාත්‍රා ශ්‍රී ලංකා මුහුදු සීමාවට ඇතුළු වීමට කරන ඕනෑම ඉල්ලීමක් රජය සළකා බලන බවයි.

සතිපතා පැවැත්වෙන කැබිනට් මාධ්‍ය හමුවේදී වෛද්‍ය ජයතිස්ස ප්‍රකාශ කළේ රජයේ ස්ථාවරය වන්නේ අදාළ කාලසීමාවන් තුළදී එක් එක් සිද්ධියට අදාළ ඉල්ලීම් සම්බන්ධයෙන් කටයුතු කිරීම බවයි.

“අපි ඉන්දියාව සහ චීනය සමඟ කටයුතු කරන්නේ රාජ්‍යතාන්ත්‍රික ආකාරයෙන්. අපි හරිම විවෘතයි.

අපගේ සෞඛ්‍ය පද්ධතියට ප්‍රතිලාභ ලබා දෙමින් සාමාජිකයන් 200 දෙනෙකුගෙන් යුත් කාර්ය මණ්ඩලයක් සහිත වෛද්‍ය නෞකාවක් දෙසැම්බර් 21 සිට 28 දක්වා ශ්‍රී ලංකාවේ සංචාරය කරන්න නියමිතයි. අපි ඔවුන්ට ඉඩ දිය යුතු බවට කිසිදු බැඳීමක් නොමැති නමුත් ඔවුන්ගේ පැමිණීම අපට ප්‍රයෝජනවත් වනවා.

ඕනෑම පර්යේෂණ යාත්‍රා ඉල්ලීමක් පැමිණි විට අපට එය අධ්‍යයනය කර විමර්ශනය කළ හැකියි, අපට අදාළ පාර්ශ්ව සමඟ සාකච්ඡා කළ හැකියි. අපි දිගුකාලීන රාජ්‍ය තාන්ත්‍රික දැක්මක් ඇතිව කටයුතු කරනවා,” යනුවෙන් ඔහු පැවසීය.

පසුගිය රජය සමයේ පනවා තිබූ පර්යේෂණ යාත්‍රා සඳහා වසරක තහනම ලිහිල් කරන්නේ දැයි විමසූ විට ඇමැතිවරයා කියා සිටියේ තහනම ලිහිල් නොකළ නමුත් රජය එකින් එක අදාළ අවස්ථාවේදී සළකා බලන බවයි.

“අපි එකින් එක සළකා බලනවා. අපි අරමුණ සළකා බලා ආරක්ෂක මණ්ඩලයෙන් සහතිකයක් ලබා ගත හැකියි,” යනුවෙන් ඔහු පැවසීය.

මේ අතර, චීන මහජන දේශපාලන උපදේශක සමුළුවේ ජාතික කමිටුවේ උප සභාපති Qin Boyong බදාදා ජනාධිපති අනුර කුමාර දිසානායක සමඟ පැවති සාකච්ඡාවකදී ප්‍රකාශ කළේ ශ්‍රී ලංකාව සහ චීනය අතර තාවකාලිකව විවිධ හේතූන් මත නතර වී පැවති සමුද්‍ර පර්යේෂණ කටයුතු නැවත ආරම්භ කිරීමට සැලසුම් කර ඇති බවයි.

ජනාධිපති අනුර කුමාර දිසානායකගේ නවදිල්ලි සංචාරය අතරතුරදී චීන පර්යේෂණ යාත්‍රා ශ්‍රී ලංකාවේ වරායන් තුළ නැංගුරම් ලෑම සම්බන්ධයෙන් පැහැදිලි සඳහනක් කරමින් ඉන්දියාව සිය ආරක්‍ෂක අවශ්‍යතා සඳහා එහි ‘වැදගත්කම සහ සංවේදීතාව’ පෙන්වා දුන්නේය.

සජීවීව විකාශය වූ නවදිල්ලියේ විශේෂ මාධ්‍ය හමුවක් අමතමින් ඉන්දීය විදේශ ලේකම් වික්‍රම් මිස්රි පැවසුවේ, “අපගේ අවබෝධය නම් ශ්‍රී ලංකාව මෙම ප්‍රශ්නය දෙස බලා සිටින බවයි. ඔවුන් සැළකිල්ලට ගත යුතු කරුණු ගණනාවක් තිබේ. සමුද්‍ර ආරක්‍ෂාව, පර්යේෂණ යනාදී ක්‍රියාකාරකම් රැසක ඉන්දියාවට ඉටු කළ හැකි කාර්යභාරය අපි අපගේ දෘෂ්ටිකෝණයෙන් ඉස්මතු කළෙමු. මේ සම්බන්ධයෙන් අපගේ ආරක්ෂක අවශ්‍යතාවල වැදගත්කම සහ සංවේදීතාව අපි පෙන්වා දුන්නෙමු. ඉන්දියාවේ ආරක්‍ෂාවට බලපෑම් එල්ල විය හැකි කටයුතු සඳහා ශ්‍රී ලංකා භූමිය භාවිත කිරීමට අවස්ථාවක් නැති බවට දිසානායක ජනාධිපතිවරයා සහතික වුණා” යනුවෙන් ඔහු ප්‍රකාශ කළේය.

“අපි මේ සියලු කාරණා සම්බන්ධයෙන් ශ්‍රී ලංකාව සමඟ දිගටම කටයුතු කරනවා,” යැයි ද ඔහු ප්‍රශ්නයකට පිළිතුරු දෙමින් පැවසීය.

රජයට තවම මාසයක් පමණක් වන බැවින්, මෙම බලගතු ජාතීන් දෙකම සාධාරණ හා රාජ්‍ය තාන්ත්‍රික ලෙස තුලනය කරන්නේ කෙසේදැයි තවම දැක ගත නොහැක.

වෙනත් බොහෝ රජයන් කිරීමට අසමත් වූ රටේ ස්වෛරීභාවය සහ මධ්‍යස්ථභාවය මෙම රටවල් සමඟ මෙම රජය පවත්වාගෙන යනු ඇත්ද යන්න ද දැක ගත හැකි වන්නේ ඉදිරි කාලයේදීය.