පුහුණු විද්‍යාල 10ක් පමණක් තිබීම නිසා පොලිස් නිලධාරීන් විශාල සංඛ්‍යාවක් බඳවා ගැනීම දුෂ්කර වුවද පවතින පුරප්පාඩු ක්‍රමයෙන් පිරවීමට මෙම වසරේ නිලධාරීන් 5,000ක් බඳවා ගැනීමට සැලසුම් කර ඇති බව මහජන ආරක්ෂක අමාත්‍යාංශය පවසයි.

මෑතකදී පාර්ලිමේන්තුවේදී අදහස් දක්වමින් මහජන ආරක්ෂක අමාත්‍ය ආනන්ද විජේපාල පැවසුවේ දැනට පොලිසියේ පුරප්පාඩු 23,170කට වැඩි ප්‍රමාණයක් සහ පොලිස් විශේෂ කාර්ය බලකායේ පුරප්පාඩු 2,076කට වැඩි ප්‍රමාණයක් පවතින බවයි.

මැතිවරණ ආශ්‍රිත කටයුතු අඛණ්ඩව සිදුවෙමින් පවතින බැවින් බඳවා ගැනීමේ කටයුතු ප්‍රමාද වී ඇති බව ඒ පිළිබඳ කළ විමසීමකදී ඔහු සඳහන් කර ඇත.

“මේ වසර තුළ නිලධාරීන් 5,000ක් බඳවා ගැනීමට අපි සැලසුම් කර තිබෙනවා. දැනට, මහා භාණ්ඩාගාරය නිලධාරීන් 2,500ක් බඳවා ගැනීම අනුමත කර තිබෙනවා.” යැයි ඔහු සඳහන් කරයි.

පොලිස් දෙපාර්තමේන්තුවට බඳවා ගැනීම අනෙකුත් රාජ්‍ය ආයතනවල මෙන් සරල නොවන බවත්, අලුතින් බඳවා ගන්නා නිලධාරීන්ට විශේෂිත පුහුණුවක් සහ ප්‍රමාණවත් පහසුකම් අවශ්‍ය වන බවත් ඔහු තවදුරටත් පැහැදිලි කළේය.

“නව බඳවා ගැනීම් සඳහා මාස හයක පුහුණුවක් ලබා ගත යුතු වුණත් පුහුණු විද්‍යාල තියෙන්නේ 10ක් විතර. කෙසේවෙතත්, අපි ක්‍රමයෙන් පුරප්පාඩු පිරවීම සඳහා කටයුතු කරනවා” යනුවෙන් ඔහු සඳහන් කරයි.

පොලිස් දෙපාර්තමේන්තුව රටේ ප්‍රධාන නීතිය ක්‍රියාත්මක කරන ආයතනය වන අතර, මහජන සාමය පවත්වා ගැනීම, අපරාධ වැළැක්වීම සහ විමර්ශනය කිරීම සහ පුරවැසියන්ගේ ආරක්ෂාව සහතික කිරීම සඳහා වගකිව යුතුය.