ශ්‍රී ලංකාව සහ මාලදිවයිනේ මෑතකදී පවත්වන ලද serological සමීක්ෂණ මගින් ලද තොරතුරු විශේෂඥ මණ්ඩලයක් විසින් තහවුරු කිරීමෙන් පසුව ‘හෙපටයිටිස් බී’ මෙම දෙරටේ පාලනය කර ඇති බව ලෝක සෞඛ්‍ය සංවිධානය(WHO) ඊයේ නිවේදනය කර ඇත.

දෙරටේ ළදරුවන් සඳහා හෙපටයිටිස් බී එන්නත් මාත්‍රාව නිරන්තරයෙන් ඉහළ ආවරණයකින් ලබාදී ඇති බවත්, මෙම මාරාන්තික රෝගයේ අඩු ව්‍යාප්තියක් ඇති බවත්, WHO සඳහන් කරයි.

ලෝක සෞඛ්‍ය සංවිධානයේ අග්නිදිග ආසියා කලාපයේ හෙපටයිටිස් බී පාලනය තහවුරු කිරීම සඳහා වූ විශේෂඥ මණ්ඩලය විසින් මාලදිවයිනේ සහ ශ්‍රී ලංකාවෙන් ළමා ප්‍රතිශක්තිකරණ දත්ත සමාලෝචනය කරන ලද අතර, එය පසුගිය වසර ගණනාවක් තිස්සේ ළදරු අවධියේදී ලබා දුන් හෙපටයිටිස් බී එන්නත් මාත්‍රා සමඟ සියයට 90කට වඩා වැඩි ආවරණයක් පෙන්නුම් කර තිබේ.

මෙම රටවල 2022-2023 දී ළමුන් අතර සිදුකරන ලද ජාතික සමීක්ෂණවල සොයාගැනීම් ද විශේෂඥයන් සමාලෝචනය කර ඇත.

“එයට ඉදිරිපත් කරන ලද සාක්ෂි මත පදනම්ව, විශේෂඥ මණ්ඩලය නිගමනය කර ඇත්තේ, හෙපටයිටිස් බී පාලනය තහවුරු කිරීම සඳහා අවශ්‍ය ප්‍රමිතීන් මෙම රටවල් දෙකෙහිම සපුරා ඇති බවත්, එබැවින් මාලදිවයිනේ සහ ශ්‍රී ලංකාවේ මෙම වැදගත් මහජන සෞඛ්‍ය ඉලක්කය සපුරා ගැනීමට නිර්දේශ කර ඇති බවත්ය.” අග්නිදිග ආසියාවේ හෙපටයිටිස් බී පාලනය තහවුරු කිරීම සඳහා වන කලාපීය විශේෂඥ මණ්ඩලයේ සභාපති වෛද්‍ය සුපමිත් චුන්සුට්ටිවත් පවසයි.

ළදරු වියේදී හෙපටයිටිස් බී ආසාදනය වැලැක්වීම නිධන්ගත ආසාදන සහ වැඩිහිටි වියේදී අක්මා පිළිකා සහ සිරෝසිස් වැනි අවස්ථා සැලකිය යුතු ලෙස අඩු කරයි.

රටවල් 11 කින් සමන්විත ලෝක සෞඛ්‍ය සංවිධානය විසින් නිරීක්ෂණය කරන අග්නිදිග ආසියා කලාපයේ නිධන්ගත හෙපටයිටිස් බී සමඟ ජීවත් වන මිලියන 60ක ජනතාවක් සිටින අතර, සෑම වසරකම සැලකිවයුතු පිරිසක් හෙපටයිටිස් බී සහ සී වලින් මියයයි.

ප්‍රතිවෛරස් ප්‍රතිකාර සඳහා සුදුසුකම් ඇති පුද්ගලයන්ගෙන් ඔවුන්ගේ තත්ත්වය දන්නේ සියයට 10ක් පමණ වන අතර, ඔවුන්ගෙන් ප්‍රතිකාර ලබන්නේ සියයට 05කට වඩා අඩු ප්‍රමාණයකි.

2016 දී, අග්නිදිග ආසියාවේ කලාපීය ප්‍රතිශක්තිකරණ තාක්‍ෂණ උපදේශක කණ්ඩායම හෙපටයිටිස් බී පාලනයේ කලාපීය ඉලක්කයක් අනුමත කරන ලද අතර, එය අවම වශයෙන් අවුරුදු 5ට අඩු ළමුන් අතර හෙපටයිටිස් බී ව්‍යාප්තිය සියයට 01ට වඩා අඩු කිරීමේ ඉලක්කයක් වේ.

හෙපටයිටිස් බී එන්නත, පෙන්ටවලන්ට් එන්නතෙහි කොටසක් ලෙස කලාපයේ සියලුම රටවල ජාතික ළමා ප්‍රතිශක්තිකරණ කාලසටහනට ඇතුළත් කර ඇති අතර, මෙම එන්නතෙහි මාත්‍රා තුනක් ඔවුන්ගේ ජීවිතයේ පළමු වසර තුළ දරුවන්ට ලබා දෙනු ලැබේ.

අලුත උපන් බිළිඳුන්ට හෙපටයිටිස් බී එන්නත උපත් මාත්‍රාවක් ලෙස ලබාදීමේ ප්‍රතිපත්තියක් කලාපයේ රටවල් අටක ඇත.