December 17, 2024
චීනය ලබාදුන් පරිත්‍යාගයක් සඳහා අගමැති ආචාර්ය හරිනි අමරසූරිය විසින් අත්වැරදීමකින් චීනයේ පරම සතුරා වන තායිවානයට ස්තුතිය ප්‍රකාශ කිරීම නිසා සිදු වූ රාජ්‍යතාන්ත්‍රික දෝෂයක් සම්බන්ධයෙන් පසුගිය දිනවල කතාබහට ලක්වී තිබේ.
මෙම සිද්ධිය වාර්තා වූයේ මහජන චීන සමූහාණ්ඩුවේ(PRC) රජය විසින් ශ්‍රී ලංකා ප්‍රජාතාන්ත්‍රික සමාජවාදී ජනරජයේ රජයට පාසල් සිසුන් සඳහා ඇඳුම් ද්‍රව්‍ය ප්‍රදානය කිරීම වෙනුවෙන් පැවති උත්සවයේ දී ය.
අදාළ ප්‍රදානය සම්බන්ධයෙන් ස්තූතිය පුදකරමින් චීන තානාපති Qi Zhenhong ඉදිරියේ අගමැති ආචාර්ය අමරසූරිය සඳහන් කර තිබුණේ ‘ඇදහිය නොහැකි තරම් ත්‍යාගශීලී පරිත්‍යාගයක්’ ලබා දීම ගැන ‘චීන ජනරජයට’ (ROC) ස්තුතියිවන්ත වන බවයි.
‘චීන ජනරජය’ (ROC) යනු තායිවානයේ නිල නාමයයි.
චීනය සහ තායිවානය සිටින්නේ යුද්ධයක් අද්දරය.
ශ්‍රී ලංකාවට තායිවානය සමඟ රාජ්‍යතාන්ත්‍රික සබඳතා නොමැති අතර ඇත්ත වශයෙන්ම චීනයෙන් බිඳීගිය එම රාජ්‍යය පිළිගැනීමක් සිදුකර නොමැත.
කොළඹ වරායේ පැවති උත්සවයට අගමැතිවරිය ප්‍රමාදවීමත් සමග චීන තානාපතිවරයා ඇය එනතුරු බලා සිටීමට සිදුවීමෙන් එදින ආරම්භය සනිටුහන් විය.
එම ප්‍රමාදය ඉවසාගත නොහැකිව චීන තානාපතිවරයා නැවත සිය කාර්යාලය වෙත ගොස් තිබිණි.
පැයකට පමණ පසු ඔහු ආපසු පැමිණ තිබූ අතර අවසානයේ අගමැතිවරිය පැමිණ, ඇය ඔවුන්ගේ පරම සතුරාට මිල අධික තෑග්ග සඳහා ස්තූති කරන විට තිගැස්සෙන්නට ඇත.
නව ආණ්ඩුවේ නවකයන් විසින් සිදුකරන ලද්දේ යැයි සිතමින්, මිත්‍ර ජාතීන් අපහසුතාවට පත්කරන මෙවැනි රාජ්‍යතාන්ත්‍රික වැරදි ලෙහෙසියෙන් නොසළකා හැරිය නොහැකිය.
මේ අතර, පසුගියදා සඳුදා ඉරාක තානාපති කාර්යාලය විසින් ඉරාකයේ රාජ්‍ය තාන්ත්‍රිකත්වයේ වසර 100 සැමරීම සඳහා කොළඹ තරු පහේ හෝටලයක උත්සවයක් පවත්වා තිබිණි.
කෙසේවෙතත්, කර්මාන්ත හා ව්‍යවසායකත්ව සංවර්ධන ඇමැති සුනිල් හඳුන්නෙත්ති එම රාජ්‍යතාන්ත්‍රික කටයුතුවලට සහභාගි වීමට පැමිණීමට නියමිතව තිබුණ ද ඔහු පෙනීසිටියේ නැත.
ඔහු වෙනුවෙන් කෙනෙකු හෝ සහභාගී කරවා තොතිබිණි.
ඇමැති හඳුන්නෙත්තිගේ කාර්යාලය හෝ විදේශ අමාත්‍යාංශයේ ප්‍රොටෝකෝල් අංශය, ඇමැතිවරයාට උත්සවයට සහභාගි වීමට නොහැකි වීම පිළිබඳ ඉරාක තානාපති කාර්යාලයට දැනුම් දී නොමැති බව ද පෙනෙන්නට තිබිණි.
ශ්‍රී ලංකාවේ ජාතික කොඩිය සහ ඉරාක ජාතික කොඩිය වේදිකාවේ තිබුණද, ශ්‍රී ලංකා රජයේ එකදු නියෝජිතයකු හෝ සහභාගි නොවී උත්සවය ඉදිරියට පැවැත්විණි.
කෙසේවෙතත් ඉරාකයේ ආරාධනයට ගරු කරමින් විපක්ෂ නායක සජිත් ප්‍රේමදාස පැමිණ සිටියේය.
තෙල්වලින් පොහොසත් ඉරාකය තවත් එක් රටක් නොවේ.
එය ශ්‍රී ලංකාවේ අංක එකේ තේ ගැනුම්කරුවා වන අතර, මේ වසරේ මුල් මාස දහය තුළ ඉරාකයට ශ්‍රී ලංකාවේ තේ අපනයනය කිලෝග්‍රෑම් මිලියන 27.11ක් විය.
ඉරාකය එක්සත් ජාතීන්ගේ ආරම්භක සාමාජිකයකු ද වෙයි.
