January 25, 2025
ඕස්ට්‍රේලියාව සමග ගාල්ලේදී පැවැත්වෙන ටෙස්ට් තරගය ශ්‍රී ලංකාවට ජයගත හැකි බව තමන් දැඩිව විශ්වාස කරන බව වැඩිම ටෙස්ට් කඩුලු ලාභියා වන ශ්‍රී ලංකාවේ හිටපු දඟ පන්දු යවන ක්‍රීඩක මුත්තයියා මුරලිදරන් පවසයි.
ශ්‍රේණිගත කිරීම්වල අංක එකේ සිටින ඕස්ට්‍රේලියාව තරග දෙකකින් යුත් ටෙස්ට් තරගාවලියේදී පරාජය කිරීමට ඔහු ශ්‍රී ලංකා කණ්ඩායම දිරිගන්වා තිබේ.
ලෝක ටෙස්ට් ශූරතාවලියේ අවසන් තරඟකරුවන් දැනටමත් තීරණය කර ඇති බැවින්, මෙම තරගාවලිය සඳහා එතරම් උණුසුමක් නොමැති වුවද, 2019 දී ගිලිහී ගිය වෝන්-මුරලි කුසලානය නැවත ලබා ගැනීමට ශ්‍රී ලංකාව උනන්දුවෙන් සිටී.
මුරලිගේ සහ දිවංගත දඟ පන්දු යවන ක්‍රීඩක ෂේන් වෝන්ගේ නමින් නම් කරන ලද ගෞරවනීය කුසලානය භාර දීමට මුරලිදරන් ගාලු ක්‍රීඩාංගණයට පැමිණීමට ද නියමිතය.
ශ්‍රී ලංකාවේ මෑත කාලීන නැගී සිටීම ඉදිරි අවස්ථාවන්ට හොඳ පෙර නිමිත්තක් බව මුරලි විශ්වාස කරයි.
ටෙලිකොම් ඒෂියා ස්පෝර්ට් වෙත අදහස් දක්වමින් මුරලි සඳහන් කළේ, “මම තරගාවලියේ අවසාන දින දෙක සඳහා ගාල්ලට එනවා, ශ්‍රී ලංකාවට ජයග්‍රහණය කළ හැකි බව මම තරයේ විශ්වාස කරනවා. ගාල්ලේ පැවැත්වූ තරග ඉතිහාසය ගත්තම අපිට වාසි සහගතයි, වඩාත් වැදගත් වෙන්නේ මෑත මාසවලදී කණ්ඩායම කණපිට හැරිලා තියෙන්නේ . සනත් ජයසූරිය ප්‍රධාන පුහුණුකරු ලෙස වැඩ භාරගත් දවසේ ඉඳන් ඔවුන් අඩුපාඩු සපුරාගෙන අඛණ්ඩව ජයග්‍රහණය කිරීමට පටන් ගෙන තිබෙනවා. පරාජයේදී පවා ඔවුන් සටනක් දෙනවා, එය ප්‍රගතියේ පැහැදිලි ලකුණක්. එය දකින්නත් සතුටුයි” යනුවෙනි.
මුරලි ශ්‍රී ලංකාවට ප්‍රධානතම වාසිය ලෙස ගාල්ල ක්‍රීඩාංගණය දඟ පන්දු යවන්නන්ට සහාය දැක්වීම බව පෙන්වා දුන්නේය.
“තණතීරුව අපගේ ශක්තීන්ට හරියටම බලපායි. මගේ එකම කණස්සල්ල වන්නේ පළමු පන්දුවෙන් දඟ පන්දු යැවීමට පටන් ගත්තොත් කාසියේ වාසිය අවසාන තීරකය බවට පත්වෙන්න පුළුවන්. එය එසේ නොවිය යුතුයි – ක්‍රිකට් යනු දක්ෂතාවයේ ක්‍රීඩාවක් මිස ලොතරැයියක් නෙවෙයි. තණතීරුව වෙනස් වුණොත් තරගය හොඳටම ක්‍රීඩා කරලා ඕස්ට්‍රේලියාව අභිබවා යෑමට ශ්‍රී ලංකාවට හැකියාව තියෙනවා. එය උද්යෝගිමත් සටනක් වෙයි.” යනුවෙන් ද ඔහු සඳහන් කළේය.
