X-Press Pearl නෞකා ව්‍යසනය සිදුවූ ස්ථානයට ආසන්න මුහුදෙන් මෑතදී එකතු කරන ලද ජල සාම්පලවල රසායනික හා භෞතික පරාමිතීන් වෙනස් වී ඇති බව වාර්තා වේ.

එය අදාළ අනතුරේ සෘජු ප්‍රතිඵලයක්ද යන්න සම්බන්ධයෙන් අවධානය යොමුව තිබේ.

පාරිසරික වශයෙන් විශාල හානියක් සිදු වී වසර තුනක් ගතවී ඇතත්, රටේ සාගර පරිසරයට දැඩි හානියක් සිදුකළ එම අනතුරට වගකිව යුතු නැව් සමාගමට එරෙහිව ශ්‍රී ලංකාව තවමත් සිය නඩු පැවරීමේ ක්‍රියාවලියේ ඉහළ ප්‍රගතියක් ලබා නැත.

ජාතික ජලජ සම්පත් පර්යේෂණ හා සංවර්ධන නියෝජිතායතනය (NARA) විසින් ජලයේ ගුණාත්මකභාවය පිළිබඳ නිරන්තර අධීක්ෂණයක් සිදු කරනු ලබයි.

ආපදාවට වගකිව යුතු නැව් සමාගමට එරෙහිව සිංගප්පූරුවේ පැවැත්වෙන නඩු කටයුතු සඳහා සමුද්‍ර පරිසර ආරක්ෂණ අධිකාරිය (MEPA) හරහා නීතිපති දෙපාර්තමේන්තුවට යැවීමට නියමිත වාර්තා සඳහා ඉදිරිපත් කළ යුතු විස්තර වෙනුවෙන් මාළු සාම්පල ද ඔවුන් විශ්ලේෂණය කිරීමට පියවර ගෙන ඇත.

MV X-Press Pearl, අන්තරායකර රසායනික ද්‍රව්‍ය රැගත් බහාලුම් නෞකාවක් 2021 මැයි 20 වැනි දින වෙරළට ඔබ්බෙන් ගිනි ගැනීමකට ලක් විය.

එය ශ්‍රී ලංකාවට දශක ගණනාවක් පැවතීමට ඉඩ ඇති පාරිසරික ව්‍යසනයක් ඉතිරි කර ඇත.

X-Press Pearl නෞකාව දින ගණනාවක් ශ්‍රී ලංකා වෙරළට ඔබ්බෙන් දැවෙමින් පැවති අතර, සැතපුම් ගණනක් ඈතට පෙනෙන ඝන අඳුරු දුමාරයක් ද ඇති කළේය.

එය මේ වන විට ශ්‍රී ලංකාවේ වෙරළට ඔබ්බෙන් අඩක් ගිලී ගොස්, එහි බඳ නොගැඹුරු සාගර පතුල මත රැඳී ඇත.

නිරිතදිග මෝසම් වර්ෂාව ආරම්භ වීමත් සමඟ අනතුර සිදුවූ මුහුදේ නම් කරන ලද ස්ථාන 14කින් එකතු කරන ලද සාම්පලවල ජලයේ ගුණාත්මකභාවය වෙනස් වී ඇති බව නාරා ආයතනයේ නිලධාරියෙක් පවසා තිබේ.

“මුහුද සන්සුන් වන විට හානියට පත් නෞකාවේ සුන්බුන් සාගර පතුල මත රැඳෙනවා. මෝසම් වැසි ආරම්භයත් සමඟම මුහුදේ සුන්බුන් ඉවත් කරනවා. මෙය ජලයේ රසායනික හා භෞතික පරාමිතීන් වෙනස් වීමට හේතුව වෙන්න පුළුවන්. එය මෙම ආපදාව නිසාද නැද්ද යන්න තහවුරු කර ගැනීම සඳහා අපි ජලයේ ගුණාත්මකභාවය නිරන්තරයෙන් අධීක්ෂණය කරනවා,” යනුවෙන් එම නිලධාරියා පවසා ඇත.

කෙසේවෙතත්, බැර ලෝහ එකතු විය හැකි මත්ස්‍ය සාම්පල ද විශ්ලේෂණය කරන බව ඔහු සඳහන් කර තිබේ.

“දැනට මාළු සාම්පලවල බැර ලෝහ හමුවන්නේ අවසර ලත් සීමාවන් තුළයි. කෙසේවෙතත්, මාළු වල බැර ලෝහ එකතු වීම දිගු ක්‍රියාවලියක්. අවසර ලත් මට්ටමට වඩා බැර ලෝහ එකතු වීමට දශකයකට වඩා වැඩි කාලයක් ගත වෙන්න පුළුවන්, ”යැයි ඔහු පෙන්වා දී ඇත.

එසේම, කොරල්පර වාසස්ථානවලට ඇතිවිය හැකි බලපෑම් සම්බන්ධයෙන් ද නාරා ආයතනය නිරීක්ෂණය කරයි.

සිංගප්පූරුවේ නැව් සමාගමට එරෙහිව ශ්‍රී ලංකාව නඩු පවරා තිබේ.

ව්‍යසනයෙන් සිදු වූ හානිය ඇමෙරිකානු ඩොලර් බිලියන 6. 4ක් ලෙස සමුද්‍ර පරිසර ආරක්ෂණ අධිකාරිය ඇස්තමේන්තු කර ඇත.

සමුද්‍ර පරිසර ආරක්ෂණ අධිකාරිය විසින් සිය නීරීක්ෂණ ඇගයීම සඳහා අන්තර්ජාතික විශේෂඥ මණ්ඩලයක් පත් කර ඇත.

නීතිපති දෙපාර්තමේන්තුව මෙම ක්‍රියාවලිය හසුරුවන්නේ දැනට පවතින නඩු තත්ත්වය පිළිබඳ තොරතුරු සුළු වශයෙන් හෝ එළිදැක්වීමකින් තොරවය.