September 9, 2024
මැතිවරණ අපේක්ෂකයන්ගේ ප්‍රචාරක ස්ටිකර් රථ වාහනවල ප්‍රදර්ශනය කිරීමට එරෙහිව ජාතික මැතිවරණ කොමිසම රියදුරන්ට දැඩි අවවාදයක් නිකුත් කර තිබේ.
මැතිවරණ කොමිෂන් සභාව නිවේදනයක් නිකුත් කරමින් පවසන්නේ, විවිධ මැතිවරණ අපේක්ෂකයන්ගේ පින්තූර සහ ලාංඡන සහිත ස්ටිකර් ප්‍රදර්ශනය කරන බස් රථ සහ ත්‍රිරෝද රථ ඇතුළු පෞද්ගලික වාහන සම්බන්ධයෙන් පැමිණිලි රැසක් ලැබී ඇති බවයි.
මෙය 1981 ජනාධිපති මැතිවරණ පනත උල්ලංඝණය කිරීමක් බව සඳහන් කරන මැතිවරණ කොමිෂන් සභාව පවසන්නේ, මෝටර් රථවල එවැනි සලකුණු සහ ස්ටිකර් සියල්ලම වහාම ඉවත් කළ යුතු බවයි.
මෙම ස්ටිකර් ඉවත් කිරීම බලාත්මක කරන ලෙස දිවයින පුරා පිහිටි පොලිස් ස්ථාන වෙත උපදෙස් ලබාදී ඇති බවද එම කොමිසම වැඩිදුරටත් කියාසිටියි.
