December 18, 2023
නියමිත ප්‍රමිතීන්ට පටහැනිව අඩු මිලට ආනයනය කරන ප්‍රමිතියෙන් තොර ලිපිද්‍රව්‍ය සහ ආහාර ද්‍රව්‍ය හේතුවෙන් පාසල් සිසුන්ගේ ජීවිත සහ ඔවුන්ගේ සෞඛ්‍ය දැඩි අවදානමකට ලක්ව ඇති බව රිජ්වේ ආර්යා ළමා රෝහලේ තත්ත්ව පාලන ඒකකයේ ප්‍රධානී විශේෂඥ වෛද්‍ය මහින්ද වික්‍රමාරච්චි පෙන්වාදෙයි.
ඔහු පැවසුවේ, පාසල් සිසුන් සහ ප්‍රාථමික අංශයේ ළමුන් විසින් ජනප්‍රියව භාවිත කරන ලාභ සහ ප්‍රමිතියෙන් තොර පාසල් ලිපිද්‍රව්‍ය සහ ප්ලාස්ටික් භාණ්ඩවලින් දේශීය වෙළෙඳ පොළ පිරී ගොස් ඇති බවයි.
සති අන්තයේදී මාධ්‍ය හමුවක් අමතමින් විශේෂඥ වෛද්‍ය වික්‍රමාරච්චි කියා සිටියේ මෙම ද්‍රව්‍යවල ප්‍රමිතිය පිළිබඳ මව්පියන් විසින් කරන ලද පැමිණිලි රාශියක් මත රිජ්වේ ආර්යා ළමා රෝහල මෑතකදී කරන ලද අධ්‍යයනයකින් මෙම බොහෝ ද්‍රව්‍යවල බැර ලෝහ අඩංගු වන බවත් මෙම ද්‍රව්‍යවලින් දරුවන්ගේ ජීවිතවලට විශාල අවදානමක් ඇති බවත් හෙළි වූ බවයි.
විශේෂයෙන්ම පැන්සල්, පාට පැන්සල් ආදිය මෙන්ම විවිධ ප්ලාස්ටික් වතුර බෝතල් සහ දිවා ආහාර පෙට්ටි මෙම කාණ්ඩයට අයත් වන ආනයනික භාණ්ඩ වේ.
“මෙම සියලුම අයිතම සඳහා සෞඛ්‍ය ප්‍රමිතීන් තිබෙනවා, විශේෂයෙන් ළමා ලිපි ද්‍රව්‍ය සහ සෙල්ලම් බඩු සඳහා EN71-3 නමින් අන්තර්ජාතික ප්‍රමිතියක් තිබෙනවා. මෙම ලිපිද්‍රව්‍ය සහ සෙල්ලම් බඩු කිසිවක් බැර ලෝහ ඇතුළත් නොවන වර්ණවලින් වර්ණාලේප කළ යුතුයි. කුඩා දරුවන් මෙම පැන්සල් භාවිත කරන විට ඒවා කටේ දමා ගැනීමට හෝ අවසානය සපා කෑමට පෙළඹෙන බව අපි දන්නවා, එමගින් ඔවුන්ගේ ජීව විද්‍යාත්මක පද්ධතියට අන්තරායකර රසායනික ද්‍රව්‍ය හෝ බැර ලෝහ ඇතුළුවීම නොවැළැක්විය හැකිය, ” යැයි විශේෂඥ වෛද්‍යවරයා පැවසීය.
විශේෂයෙන් ආහාර බඳුන් හෝ දියර වර්ග අඩංගු ප්ලාස්ටික් භාණ්ඩ සඳහා ආරක්ෂිත කේතයක් පවතින බව ද වෛද්‍ය වික්‍රමාරච්චි පැවසීය.
ප්ලාස්ටික් භාණ්ඩ අන්තර්ජාතික වශයෙන් කේත 01, 02, 03, 04 සහ 05 සිට ප්‍රමිතිගත කර ඇත.
කේත අංක 05 ආහාර ඇසුරුම් හෝ ජල බඳුන් සඳහා ප්‍රමිතිය වන අතර මව්පියන් තම දරුවන්ගේ ජල බෝතල් මිලදී ගැනීමේදී මෙම අගය පරීක්ෂා කිරීම සඳහා සැළකිලිමත් විය යුතුය.
“ප්ලාස්ටික් භාණ්ඩවල Bisphenol A (BPA) නම් ඉතා භයානක රසායනික ද්‍රව්‍යයක් අඩංගු වන අතර එය කාලයත් සමඟ ළමුන් තුළ පිළිකා සෛල පවා ඇති කළ හැකියි. ඒ නිසා දරුවන්ගේ ඉදිරි පාසල් වාරයට ලිපිද්‍රව්‍ය මිලදී ගැනීමේදී මව්පියන් මේ සෞඛ්‍ය කරුණු ගැන සැළකිලිමත් විය යුතුයි.” වෛද්‍යවරයා වැඩිදුරටත් පැවසීය.
42.31%
17.27%
32.76%
