රිමාන්ඩ් භාරයේ සිටින රැඳවියන්ට ජනාධිපතිවරණය, පාර්ලිමේන්තු මැතිවරණය ඇතුළු සෑම ජනමත විචාරණයකදීම ඡන්දය ප්‍රකාශ කිරීමට පහසුකම් සැලසීම සඳහා අවශ්‍ය මාර්ගෝපදේශ නිකුත් කරන ලෙස මැතිවරණ කොමිසමට නියෝග කරන්නැයි ඉල්ලා ශ්‍රේෂ්ඨාධිකරණයට රිට් පෙත්සමක් ගොනු කර තිබේ.

මෙම පෙත්සම ගොනු කර තිබුණේ රැඳවියන්ට ඡන්දය ප්‍රකාශ කිරීමේ ක්‍රියාවලියක් නොමැතිවීම හේතුවෙන් ඡන්දය ප්‍රකාශ කිරීමට නොහැකි වූ හිටපු රැඳවියකු වන සුදේශ් නන්දිමාල් සිල්වා විසිනි.

බන්ධනාගාර දෙපාර්තමේන්තුවේ දත්තවලට අනුව 2024 මැයි මාසය වන විට ශ්‍රී ලංකාව තුළ රිමාන්ඩ් සිරකරුවන් 19,867ක් සිටින බවත්, එය මුළු බන්ධනාගාරවල සිටින සමස්ත පිරිසෙන් 64.7%ක් බවත් පෙත්සම්කරු සඳහන් කර තිබේ.

බන්ධනාගාර පද්ධතිය තුළ නිසි ඡන්ද යාන්ත්‍රණයක් නොමැති වීම හේතුවෙන් මෙම පුද්ගලයන්ට ඔවුන්ගේ ව්‍යවස්ථාපිත ඡන්ද අයිතිය අහිමි වන බව පෙත්සම්කරු පෙන්වා දී ඇත.

රිමාන්ඩ් භාරයේ සිටින රැඳවියන්ට ඡන්දය ප්‍රකාශ කිරීමට පහසුකම් සැලසීමේ යාන්ත්‍රණයක් සැකසීම සඳහා අවශ්‍ය මාර්ගෝපදේශ නිකුත් කිරීමේ බලය ආණ්ඩුක්‍රම ව්‍යවස්ථාවේ 103 සහ 104 බී වගන්ති ප්‍රකාරව මැතිවරණ කොමිෂන් සභාව වෙත සෘජුවම පැවරෙන බවත් එය පිළිනොපැදීම මගින් කොමිෂන් සභාව විසින් 103 සහ 104B වගන්තිවලට එරෙහිව නීති විරෝධී ක්‍රියාවක් සිදුකර ඇත්ද යන්න සම්බන්ධයෙන් අධිකරණ සමාලෝචනයක් අවශ්‍ය බවත් පෙත්සම්කරු පවසයි.

සුදුසුකම් ඇති රැඳවියන්ට ඡන්දය ප්‍රකාශ කිරීමට පහසුකම් නොමැතිවීම ආණ්ඩුක්‍රම ව්‍යවස්ථාවෙන් සහතික කර ඇති අයිතිවාසිකම් උල්ලංඝනය කිරීමක් බවද පෙත්සම්කරු සඳහන් කර තිබේ.