June 2, 2024
ජනාධිපතිවරණය අවසන් වූ වහාම අතුරු සම්මත ගිණුමක් සඳහා සූදානම් වන ලෙස ජනාධිපති රනිල් වික්‍රමසිංහ මුදල් අමාත්‍යාංශයේ නිලධාරීන්ට උපදෙස් දී තිබේ.
අන්තර්ජාතික මූල්‍ය අරමුදලේ (IMF) ප්‍රතිපත්ති හා ඉලක්කවලට අනුකූලව අතුරු සම්මත ගිණුම සකස් විය යුතු බවට ද ජනාධිපතිවරයා උපදෙස් දී තිබේ.
මුදල් රාජ්‍ය ඇමැති ෂෙහාන් සේමසිංහ පවසන්නේ ජනාධිපතිවරණයට පසු පාර්ලිමේන්තු මැතිවරණයක් පැවැත්වීමට නියමිත බැවින් අයවැයක් සම්මත කිරීමට ප්‍රතිපාදන නොමැති බවත් එබැවින් අතුරු සම්මත ගිණුමක් සකස් කිරීම සුදුසු බවත් මුදල් අමාත්‍යාංශයේ නිලධාරීන් සමඟ පැවති සාකච්ඡාවකදී ජනාධිපතිවරයා පැහැදිලි කළ බවයි.
මැතිවරණ කාලසීමාව තුළ අන්තර්ජාතික මූල්‍ය අරමුදලේ වැඩසටහනේ තිරසර බව තහවුරු කිරීම සඳහා අවශ්‍ය ඉලක්ක වෙත ළඟා වීමට අවශ්‍ය කටයුතු ජනාධිපතිවරයා විසින් සම්පාදනය කර තිබූ බව රාජ්‍ය ඇමැතිවරයා සඳහන් කරයි.
සේමසිංහ රාජ්‍ය ඇමැතිවරයා පවසන්නේ අන්තර්ජාතික මූල්‍ය අරමුදල සමඟ ඇති මීළඟ කාර්ය මණ්ඩල මට්ටමේ ගිවිසුම ගැටලුවලින් තොරව ළඟා කර ගැනීමට හැකි වන පරිදි ඉලක්ක සකස් කර ඇති බවය.
මීළඟ කාර්ය මණ්ඩල මට්ටමේ සංචාරය දෙසැම්බර් මාසයේදී සිදුකිරීමට නියමිත අතර මීළඟ වාරිකය ලබන වසරේ පළමු කාර්තුවේදී ලබාදීමට නියමිතය.
මුදල් අමාත්‍යාංශයේ ජ්‍යෙෂ්ඨ නිලධාරියකු පෙන්වා දුන්නේ සාමාන්‍යයෙන් අතුරු සම්මත ගිණුමක් මාස තුනක් සඳහා වලංගු වන නමුත් පාර්ලිමේන්තු මැතිවරණයෙන් පසු නව රජයක් පිහිටුවන තෙක් තේරී පත් වූ ජනාධිපතිවරයාට එය දීර්ඝ කළ හැකි බවයි.
මෙතෙක් භාණ්ඩාගාරයෙන් මුදල් වෙන්කර තිබුණේ ජනාධිපතිවරණයට පමණක් බවත්, අවශ්‍ය නම් පාර්ලිමේන්තු මැතිවරණයකට අදාළ මුදල් අතුරු සම්මත ගිණුමට ඇතුළත් කළ හැකි බවත් ඔහු සඳහන් කළේය.
