සැප්තැම්බර් මාසය සඳහා සංචාරක පැමිණීම් අපේක්ෂා කළ ප්‍රමාණයට වඩා අඩු මට්ටමක පවතින බව ශ්‍රී ලංකා සංචාරක සංවර්ධන අධිකාරියේ දත්ත පෙන්වාදෙයි.

“අවාසනාවකට, වීසා ප්‍රශ්නය බොහෝ ගැටලු ඇති කර තිබෙනවා. එය අපේක්ෂිත මට්ටමට වඩා අඩු පැමිණීම් සඳහා හේතුවක් විය හැකියි. ඉදිරි දිනවලදී එම සංඛ්‍යාව තවත් අඩු වෙන්න පුළුවන්,” යනුවෙන් රී ලංකා සංචාරක සංවර්ධන අධිකාරියේ සභාපති ප්‍රියන්ත ප්‍රනාන්දු ප්‍රකාශ කර ඇත.

දේශීය සංචාරක ක්ෂේත්‍රය පුනර්ජීවනය සහ වර්ධනය කරා ගමන් කිරීම ඇරඹීමත් සමග මැයි මාසයේදී, VFS Global විසින් ප්‍රමුඛ සන්ධානයකට වීසා සැකසීම රජය විසින් ප්‍රදානය කිරීමත් සමඟ නව ගැටලුවක් නිර්මාණය විය.

ක්‍ෂේත්‍රයේ පාර්ශ්වකරුවන්ගේ අදහස් විමසීමකින් තොරව ක්‍රියාත්මක කරන ලද මෙම ක්‍රමය පහසු නොවීම හේතුවෙන් අන්තර්ජාතික සංචාරකයන් සඳහා වීසා ලබා ගැනීමේ ක්‍රියාවලිය වඩාත් මිල අධික හා දුෂ්කර විය.

එම පියවරට එරෙහිව මූලික අයිතිවාසිකම් නඩු අටක් ගොනු කිරීමෙන් පසුව, අගෝස්තු මාසයේදී ලබා දී තිබූ කොන්ත්‍රාත්තුව අත්හිටුවීමට ශ්‍රේෂ්ඨාධිකරණ නියෝගයක් ලබා දෙන ලදී.

ශ්‍රී ලංකා ටෙලිකොම්-මොබිටෙල් විසින් පවත්වාගෙන ගිය පෙර ක්‍රමයට නැවත යොමුවන ලෙස ශ්‍රේෂ්ඨාධිකරණය නියෝගයක් ලබාදී ඇතත්, මෙතෙක් එවැනි පියවරක් ගෙන නොමැත.

ලබාදුන් නියෝගය ක්‍රියාත්මක නොකිරීම හේතුවෙන් ආගමන විගමන පාලක ජනරාල්වරයාට පෞද්ගලිකව අධිකරණය හමුවේ පෙනී සිටින ලෙස ශ්‍රේෂ්ඨාධිකරණය පසුගිය සතියේ නියෝගයක් නිකුත් කළේය.

වීසා ප්‍රශ්නය මත ඇති වූ අහිතකර බලපෑම හේතුවෙන් අගෝස්තු මාසයේදී ශ්‍රී ලංකාවට ඇමෙරිකානු ඩොලර් මිලියන 75-80ක් පමණ අහිමි වූ බව ප්‍රනාන්දු පෙන්වාදෙයි.

ශ්‍රී ලංකා සංචාරක සංවර්ධන අධිකාරිය විසින් නිකුත් කරන ලද තාවකාලික දත්ත පෙන්නුම් කළේ සැප්තැම්බර් මාසයේ පළමු දින 11 සඳහා සංචාරක පැමිණීම් 45,000ට වඩා අඩුවෙන් වාර්තා වී එය 44,977ක් ලෙස සටහන් වන බවයි.

දෛනික පැමිණීමේ සාමාන්‍යය 4,088 දක්වා පහත වැටී තිබේ.

සැප්තැම්බර් මාසය සඳහා මෙතෙක් ශ්‍රී ලංකා සංචාරක ව්‍යාපාරය සඳහා විශාලතම සංචාරක ගමනාගමනය උත්පාදනය කරන රට ලෙස ඉන්දියාව ශ්‍රේණිගත කර ඇති අතර එය සමස්ත සංචාරක පැමිණීම්වලින් සියයට 19.6ක් වේ.

එක්සත් රාජධානිය දෙවැනි ස්ථානයේ සිටින්නේ සමස්ත සංචාරක පැමිණීම් සඳහා සියයට 8.3ක දායකත්වයක් ලබා දෙමිනි.

ජර්මනිය තුන්වැනි විශාලතම වෙළඳපොළ ලෙස පවතින්නේ මුළු පැමිණීම්වලින් සියයට 7.4ක දායකත්වයක් සපයමිනි.