2020 වසරේ පනවා තිබූ වාහන ආනයන තහනම සම්පූර්ණයෙන්ම ඉවත් කිරීමට රජය ඉකුත් දා ගත් තීරණයෙන් සති දෙකක් පමණක් ගතව ඇති පසුබිමක වාහන ආනයනකරුවන් විසින් එම කර්මාන්තයට බාධා පමුණුවන ගැටළු කිහිපයක් පිළිබඳ අනාවරණ කර තිබේ.

ඒ අනුව ජනමාධ්‍ය හමුවකදී අදහස් දක්වමින් ශ්‍රී ලංකා වාහන ආනයනකරුවන්ගේ සංගමයේ සභාපති ඉන්දික සම්පත් මෙරෙන්චිගේ පැවසුවේ, ජපානයේ ප්‍රමුඛ පෙළේ බැංකු, මෙරට බැංකු විසින් නිකුත් කරන ලද ණයවර ලිපි (LC) ප්‍රතික්ෂේප කිරීම කිරීමේ තත්ත්වයක් පවතින බවයි.

“2020 වසරේ වාහන ආනයන තහනම පැනවූ අවස්ථාවේ රජය ගත් අනිසි තීරණය හේතුවෙන් ජපානයේ ප්‍රමුඛ පෙළේ බැංකු මේ වන විට ශ්‍රී ලංකා LC ප්‍රතික්ෂේප කිරීම නිසා වාහන ආනයනකරුවන්ට විශාල ප්‍රශ්න ඇති වී තිබෙනවා” ඔහු පැවසීය.

මේ වන විටත් LC නිකුත් කර ඇති වාහන ආනයනය තහනම් කිරීමට මුදල් ලේකම් පී.බී. ජයසුන්දරගේ ප්‍රධානත්වයෙන් මුදල් අමාත්‍යාංශය ගත් වැරදි තීරණ හේතුවෙන් ජපානයේ ප්‍රමුඛ පෙළේ බැංකු මේ වන විට මෙරට බැංකු විසින් LC නිකුත් කිරීම ප්‍රතික්ෂේප කර ඇති බවද ඔහු සඳහන් කළේය.

මෙම ගැටළුව විසඳීමට මැදිහත් වන ලෙස ඔවුන් රජයෙන් ඉල්ලා සිටින අතර, වසර 2 හෝ ඊට වැඩි වාහන පමණක් ආනයනය කිරීම සීමාකර ඇති නිෂ්පාදිත වර්ෂය වෙනුවට වාහනයේ නිෂ්පාදිත දිනය පිළිබඳ තාක්ෂණික දෝෂය නිවැරදි කරන ලෙස මෙරෙන්චිගේ වැඩිදුරටත් රජයෙන් ඉල්ලා සිටියේය.

“මෙම ප්‍රශ්නය නිසා අපට වෙන්දේසියේ ඇත්තේ සීමිත වාහන සංඛ්‍යාවක් පමණයි. එමඟින් මෙම වාහන සඳහා ඇති ඉල්ලුම වැඩිවන අතර එමඟින් වාහන මිල ඉහළ යනවා” ඔහු පැවසීය.

මෙම අවුරුදු සීමාව අවුරුදු 5 දක්වා වැඩිකරන ලෙස රජයෙන් ඉල්ලා සිටින බවත්, එවිට අඩු ඉල්ලුමක් සහ අඩු මිලට වාහන වැඩි සංඛ්‍යාවක් ලබාගත හැකි අතර එමඟින් මෝටර් රථයක් පිළිබඳ සිහින දකින මධ්‍යම පාන්තික ජනතාවට පවා ප්‍රතිලාභ හිමිවන බවත් ඔහු වැඩිදුරටත් පැවසුවේය.