පෞද්ගලික පරිහරණය සඳහා වාහන ආනයනය කිරීමට පනවා තිබූ සීමාවන් ලබන මාසයේ සිට ඉවත් කිරීමට නියමිත අතර විදේශ විනිමය පිටතට ගලා යෑම කෙරෙහි එහි බලපෑම පිළිබඳ රජය දැඩි අවධානයෙන් සිටිනු ඇති බව වාර්තා වේ.

ජ්‍යෙෂ්ඨ භාණ්ඩාගාර නිලධාරියකුට අනුව වාහන ආනයන තහනම ඉවත් කිරීමේ රජයේ ඉලක්කය ආර්ථිකය නංවාලීම සහ බදු ආදායම ඉහළ නැංවීම වුවද, වාහන ආනයනයට ඉඩ දීම තවමත් අවදානම් තත්ත්වයක පවතින්නේ එය විදේශ විනිමය පිටතට ගලායෑමට සහ රුපියලේ උච්චාවචනයට කෙසේ බලපානු ඇත්දැයි නොදන්නා බැවිනි.

එසේ වුවද, අමෙරිකානු ඩොලරයට සාපේක්ෂව රුපියල කොපමණ උච්චාවචනය වේද යන්න තක්සේරු කළ හැක්කේ සීමාවන් ඉවත් කිරීමෙන් පසුව පමණක් බව ඔහු සඳහන් කර තිබේ.

පෞද්ගලික පරිහරණය සඳහා වාහන ආනයනය කිරීම සඳහා පනවා ඇති තහනම ඉවත් කිරීමට යෝජනා කරන කැබිනට් පත්‍රිකාවක් මේ මස අගදී කැබිනට් මණ්ඩලයට ඉදිරිපත් කිරීමට නියමිතය.

ඉන් අනතුරුව එය ගැසට් කර පෙබරවාරි 1 වැනිදා සිට ක්‍රියාත්මක කෙරේ.

වාහන ආනයන තහනම ඉවත් කිරීම අන්තර්ජාතික මූල්‍ය අරමුදලේ කොන්දේසියකි.

සීමාවන් ඉවත් කළ පසු, රජය ඒ බව අන්තර්ජාතික මූල්‍ය අරමුදල වෙත දැනුම් දෙනු ඇත.

මෙම පියවර ශ්‍රී ලංකාව සඳහා වන විස්තීරණ අරමුදල් පහසුකම පිළිබඳ අන්තර්ජාතික මූල්‍ය අරමුදලේ මීළඟ සමාලෝචනයට සළකා බලනු ඇත.

“විදේශ විනිමය පිටතට ගලායෑම සහ රුපියල අවප්‍රමාණය වීම ඕනෑවට වඩා වුවහොත්, යම් යම් සීමා කිරීම් නැවත හඳුන්වා දීමට අපට බල කෙරෙනු ඇතැයි අපි අන්තර්ජාතික මූල්‍ය අරමුදල වෙත පවසා තිබෙනවා,” යනුවෙන් එම නිලධාරියා වැඩිදුරටත් පැවසීය.

සමහර කාණ්ඩ සඳහා අවුරුදු පහක් දක්වා පැරණි වාහන ආනයනය කළ හැකි අතර අනෙක් ඒවා සඳහා උපරිම වශයෙන් වසර තුනක් ඇත.

එම නිලධාරියාට අනුව මේ සම්බන්ධයෙන් අවසන් තීරණයක් ගෙන නොමැත.

ආනයනය කරන වාහන සඳහා 300% දක්වා බදු පැනවෙන අතර, මෙම බද්දේ කිසිදු අඩුවීමක් සිදු නොවන බව එම නිලධාරියා වැඩිදුරටත් පැවසීය.

වාහන ආනයනයට ඉඩ දීමෙන් රජය වාර්ෂිකව ඩොලර් බිලියනයක් දක්වා ආදායමක් ලබා ගැනීමට අපේක්ෂා කරන බව ඔහු පැවසීය.

ආර්ථික අර්බුදයට පෙර නිකුත් කර ඇති වාහන බලපත්‍ර 22,000ක් පමණ ද තිබූ බව එම නිලධාරියා වැඩිදුරටත් පැවසීය.

“ආනයන සීමාවන් ඉවත් කිරීමේ දෙවැනි අදියර යටතේ මෙම ආනයන සඳහා අවසර දීම පිළිබඳ අපි සළකා බලනවා. ස්ථාවර විනිමය අනුපාතිකයක් තිබීම අපට ඒ සඳහා පහසු වනු ඇත,” යනුවෙන් ඔහු වැඩිදුරටත් පැවසීය.