November 17, 2024
එක්සත් ජාතික පක්ෂයේ ඉදිරි දේශපාලන ගමන්මග පිළිබඳ විශේෂ සාකච්ඡාවක් එම පක්ෂයේ නායක හිටපු ජනාධිපති රනිල් වික්‍රමසිංහගේ ප්‍රධානත්වයෙන් ඊයේ (16) පැවැත්වී තිබේ.
මෙම රැස්වීමට එක්සත් ජාතික පක්ෂයේ හිටපු පාර්ලිමේන්තු මන්ත්‍රීවරුන් කිහිප දෙනෙකුද එක්ව වී ඇත.
ඉදිරි මැතිවරණ සඳහා පක්ෂයේ උපායමාර්ග පිළිබඳ මෙම සාකච්ඡාවේදී අවධානය යොමු වූ බව වාර්තා වේ.
එහිදී අවධාරණය කර ඇත්තේ ‘අලියා’ ලකුණින් තරග කිරීමටයි.
රැස්වීමෙන් අනතුරුව ජනමාධ්‍ය වෙත අදහස් දක්වමින් එක්සත් ජාතික පක්ෂයේ සභාපති හිටපු පාර්ලිමේන්තු මන්ත්‍රී වජිර අබේවර්ධන තහවුරු කළේ ඉදිරි මැතිවරණ සියල්ලට අලියා ලකුණින් තරඟ කිරීමට එක්සත් ජාතික පක්ෂය සැලසුම් කර ඇති බවයි.
පක්ෂයේ ස්ථාවරත්වය ශක්තිමත් කිරීමට සහ පක්ෂයේ ඉදිරි ගමන්මග ශක්තිමත් කිරීමට මෙම තීරණය ගත් බව අබේවර්ධන සඳහන් කළේය.
ශ්‍රී ලංකාවේ පැරණිතම දේශපාලන පක්ෂයක් වන එක්සත් ජාතික පක්ෂයට එහි අනන්‍යතාව සහ ඡන්දදායකයන් රඳවා ගැනීමේ කේන්ද්‍රස්ථානය වූ ‘අලියා’ ලකුණ සමඟ දිගුකාලීන සම්බන්ධයක් ඇත.
