July 21, 2023
උසස් අධ්‍යාපනය සංවර්ධනය කිරීම සඳහා පත්කරන ලද විශේෂ තේරීම් කාරක සභාව විශ්වවිද්‍යාල ප්‍රතිපාදන කොමිෂන් සභාව (UGC) අහෝසි කර, ඒ වෙනුවට ස්වාධීන “ජාතික උසස් අධ්‍යාපන කොමිෂන් සභාවක්” නව නීති සම්පාදනයක් මගින් පනවන ලෙස නිර්දේශ කර ඇත.
යෝජිත ජාතික උසස් අධ්‍යාපන කොමිෂන් සභාව, ආණ්ඩුක්‍රම ව්‍යවස්ථා සභාවේ පූර්ව අනුමැතිය ඇතිව ජනාධිපතිවරයා විසින් පත් කරන ලද සාමාජිකයින් 11 දෙනකුගෙන් සමන්විත විය යුතු බවට, එම කමිටුව නිර්දේශ කර ඇති බව තේරීම් කාරක සභාවේ සභාපති ඇමැති විජයදාස රාජපක්ෂ ජනමාධ්‍යවේදීන් හමුවේ ප්‍රකාශ කළේය.
ඇමැතිවරයා පෙන්වාදෙන ආකාරයට, මෙම කොමිෂන් සභාවේ සාමාජිකයන් විය යුත්තේ ශාස්ත්‍රීය, වෘත්තීය සහ කළමනාකරණය වැනි අදාළ ක්ෂේත්‍රවල කීර්තියක් අත්කර ගත් පුද්ගලයන්ය.
එසේම කොමිෂන් සභාව රාජ්‍ය විශ්වවිද්‍යාල කමිටුවක්, රාජ්‍ය නොවන විශ්වවිද්‍යාල කමිටුවක්, වෘත්තීය අධ්‍යාපන ආයතන සහ තත්ත්ව සහතිකය පිළිබඳ අනුකමිටුවක් යන අනුකමිටු හතරකින් සමන්විත විය යුතු බවද ඇමැතිවරයා සඳහන් කරයි.
රාජ්‍ය-පෞද්ගලික හවුල්කාරිත්වය යටතේ විශ්වවිද්‍යාල පිහිටුවීමටත්, රාජ්‍ය විශ්වවිද්‍යාලවල ස්වාධීනත්වය ආරක්ෂා කරමින් මූල්‍ය, යහපාලනය, වගවීම සහ විනිවිදභාවය පිළිබඳ වගකීම පවරමින් පරිපාලන පද්ධතිය ප්‍රතිසංස්කරණය කිරීමටත් තේරීම් කාරක සභාව තවදුරටත් නිර්දේශ කර ඇත.
තවත් නිර්දේශයක් වන්නේ විභාග සහ අඛණ්ඩ ඇගයීම් යන දෙකම පදනම් කරගෙන සිසුන් ඇගයීමට ලක් කෙරෙන මිශ්‍ර ඇගයීමක් හඳුන්වා දීමයි.
මුල් ළමාවිය අධ්‍යාපනය සහ ප්‍රාථමික / ද්විතීයික අධ්‍යාපනය පිළිබඳව ද අවධානය යොමු කර ඇති තේරීම් කාරක සභාව, පූර්ව ළමාවිය අධ්‍යාපන ආයතන සහ සියලුම පෞද්ගලික පාසල් අධීක්ෂණය සඳහා ආයතන පිහිටුවීමට තවදුරටත් නිර්දේශ කර ඇත.
