November 23, 2023
උතුරු චීනයේ ළමුන් තුළ හඳුනානොගත් නියුමෝනියා පොකුරු වාර්තා වීම ඉහළ යමින් පවතින බවට ලෝක සෞඛ්‍ය සංවිධානය(WHO) අනතුරු අඟවයි.
“මෙය චීන බලධාරීන් විසින් කලින් වාර්තා කරන ලද ශ්වසන ආසාදනවල සමස්ත වැඩිවීම්වලට සම්බන්ධ වේද යන්න පැහැදිලි නැත,” යනුවෙන් WHO නිවේදනයක් නිකුත් කරමින් සඳහන් කරයි.
ලෝක සෞඛ්‍ය සංවිධානය වැඩිදුරටත් පවසන්නේ, නොවැම්බර් 22 වන දින, අන්තර්ජාතික සෞඛ්‍ය රෙගුලාසි යාන්ත්‍රණය හරහා ළමුන් අතර වාර්තා වූ මෙම පොකුරුව සම්බන්ධයෙන් පවතින සායනික තොරතුරු මෙන්ම රසායනාගාර ප්‍රතිඵල ද චීනයෙන් ඉල්ලා ඇති බවයි.
මෙම තත්වය නිවැරදිව හඳුනාගැනීම සඳහා චීනයේ පවතින තාක්‍ෂණික හවුල්කාරිත්වයන් හා ජාල හරහා වෛද්‍යවරුන් සහ විද්‍යාඥයන් සමඟ ද සම්බන්ධ වන බව ලෝක සෞඛ්‍ය සංවිධානය පවසයි.
ඔක්තෝබර් මැද සිට, උතුරු චීනය පසුගිය වසර තුනේ එම කාලපරිච්ඡේදයට සාපේක්ෂව ඉන්ෆ්ලුවෙන්සා වැනි රෝගවල වැඩිවීමක් වාර්තා කර ඇත.
WHO මෙම අමතර තොරතුරු සොයන අතර, චීනයේ ජනතාවට නිර්දේශිත එන්නත් ඇතුළු ශ්වසන රෝග අවදානම අඩු කිරීමට අවශ්‍ය පියවර අනුගමනය කරන ලෙස නිර්දේශ කර තිබේ.
