ශ්‍රී ලංකාවේ ක්‍රියාත්මක කප්පාදු පියවරවල බලපෑම පිළිබඳ එක්සත් ජාතීන්ගේ මානව හිමිකම් පිළිබඳ මහ කොමසාරිස් වොල්කර් ටර්ක් කණස්සල්ල මතු කර තිබේ.

ශ්‍රී ලංකාවේ සාර්ව-ආර්ථික තත්ත්වය වැඩිදියුණු වී ඇති අතර, ආර්ථික අර්බුදයේ බලපෑම් සහ ඒ ආශ්‍රිත කප්පාදු පියවරයන් වඩාත් බලපාන්නේ දුප්පත්ම සහ දැනටමත් ආන්තික කණ්ඩායම්වලට බව ඔහු පැවසීය.

“2021 සහ 2023 අතර, දරිද්‍රතා අනුපාතය සියයට 13.1 සිට 25.9 දක්වා දෙගුණයක් වී ඇති අතර එය ඉදිරි වසර කිහිපය තුළ එවැනි මට්ටම්වලම පවතිනු ඇතැයි අපේක්ෂා කෙරේ,” යනුවෙන් ඔහු එක්සත් ජාතීන්ගේ මානව හිමිකම් කවුන්සිලයට පවසා තිබේ.

මානව හිමිකම් කවුන්සිලයේ 56 වැනි සැසිවාරයේදී ගෝලීය යාවත්කාලීනය ප්‍රකාශ කරමින් ඔහු ඊයේ මේ බව පවසා ඇත.

“ගෝලීය වශයෙන්, දශක තුනකින් අසමානතාවේ විශාලතම වැඩිවීමක් දැක තිබේ, දුප්පත් රටවල් ධනවත් රටවලට සාපේක්ෂව කොවිඩ් 19 වසංගතයෙන් විශාල ආර්ථික පහරක් එල්ල කර තිබේ,” යනුවෙන් ටර්ක් පවසා තිබේ.

දිළිඳු බව පිටු දැකීම සඳහා ක්‍රියාත්මක රාජ්‍ය නොවන සංවිධානයක් වන Oxfamට අනුව, මෙම දශකය ආරම්භයේ සිට ලෝකයේ ධනවත්ම ප්‍රකෝටිපතියන් පස්දෙනාගේ ධනය දෙගුණයකටත් වඩා වැඩි වී ඇති අතර, මනුෂ්‍ය වර්ගයාගෙන් සියයට 60ක් දුප්පත් වී ඇත.

2019 වසරට වඩා බිලියන 4.8ක ජනතාවක් දුප්පත් බවත් ගෝලීය වශයෙන් පිරිමින් සහ කාන්තාවන් අතර ධන පරතරය ඩොලර් ට්‍රිලියන 100ක් බවත් ටර්ක් පවසා තිබේ.