සුනඛයකුට ලී පොල්ලකින් පහරදීම සම්බන්ධයෙන් අවශ්‍යව සිටි සැකකරුවන් දෙදෙනෙකු අක්මීමන පොලිසිය විසින් අත්අඩංගුවට ගෙන තිබෙනවා.

සමාජ මාධ්‍ය ඔස්සේ විශාල වශයෙන් ප්‍රචාරය වූ මෙම සිද්ධියෙන් දැක්වෙන්නේ සැකකරුවන් ත්‍රිරෝද රථයකින් පැමිණ සුනඛයාට පහරදෙන ආකාරයයි.

පසුගිය දෙසැම්බර් 11 වනදා සැකකරුවන් විසින් තම සුනඛයාට පහර දී තුවාල සිදුකර ඇති අතර, පසුව සුනඛයා මියගොස් ඇති බව පවසමින් සුනඛයාගේ හිමිකරු අක්මීමන පොලිසියට ඊයේ පැමිණිල්ලක් කර තිබිණි.

සිද්ධිය සම්බන්ධයෙන් විමර්ශනයක් ආරම්භ කර සැකකරුවන් ත්‍රිරෝද රථය සමඟ ඊයේ අත්අඩංගුවට ගනු ලැබ ඇත.

සැකකරුවන් අවුරුදු 34 සහ 37 වයස්වල පසුවන බටදූව ප්‍රදේශයේ පදිංචිකරුවන් බව පොලිසිය පවසයි.

සැකකරුවන් අද ගාල්ල මහේස්ත්‍රාත් අධිකරණයට ඉදිරිපත් කිරීමට නියමිතය.