January 4, 2024
ශ්‍රී ලාංකික සම්භවයක් සහිත කාන්තාවන්ගෙන් සමන්විත පලස්තීන පවුල් දෙකක් ආරක්ෂිතව ශ්‍රී ලංකාවට පැමිණ තිබේ.
ශ්‍රී ලංකාවේ පලස්තීන තානාපති ආචාර්ය Zuhair Dar Zaid පවසන පරිදි මෙම පවුල් දෙක ශ්‍රී ලාංකික සහ පලස්තීන සම්භවයක් ඇති පවුල් දෙකක් වන අතර එම පවුල් දෙකේ මව්වරුන් ශ්‍රී ලාංකික මුස්ලිම් ජාතිකයන් වේ.
පලස්තීන තානාපති ආචාර්ය Zuhair Dar Zaidගේ ප්‍රධානත්වයෙන් පැවැති ජනමාධ්‍ය හමුවකදී, ඊශ්‍රායලය සමඟ ගැටුම් ඇතිවීමෙන් පසු පලස්තීනයේ තමන් මුහුණ පා සිටින දුක්ඛිත තත්ත්වය පිළිබඳ එම කාන්තාවන් හෙළිකර තිබේ.
ඊශ්‍රායල හමුදා විසින් ද බෝම්බ ප්‍රහාර එල්ල කරන ලද ගාසා තීරයේ පිහිටි ඔවුන්ගේ නිවාස අත්හැර ආරක්ෂිත ස්ථාන කරා යෑමට තමන්ට බලකෙරුණු බව ඔවුහු කියා සිටියහ.
තමන් සතුව විදේශ ගමන් බලපත්‍ර පවා නොමැති වීම නිසා ශ්‍රී ලංකාවට පැමිණීමට අවශ්‍ය විදේශ ගමන් බලපත්‍ර ලබාගැනීමට ශ්‍රී ලංකා තානාපති කාර්යාලය උදව් කළ බව ඔවුහු සඳහන් කළහ.
මෙම ගැටුමින් තම දරුවන් කම්පනයට පත්ව ඇති බවත්, තම අධ්‍යාපනයද ඇනහිට ඇති බවත්, භාෂා බාධාව අධ්‍යාපනයට තවදුරටත් බලපානු ඇති බවත් එම කාන්තාවෝ වැඩිදුරටත් කියාසිටියහ.
මේ අතර, මෙම පවුල් දෙකට ගාසා තීරයෙන් පිටවී ශ්‍රී ලංකාවට පැමිණීමට සහාය වීම පිළිබඳව ශ්‍රී ලංකාවේ පලස්තීන තානාපති ආචාර්ය Zuhair Dar Zaid ශ්‍රී ලංකා රජයට සිය කෘතඥතාව පළකළේය.
