මොරගහහේන, මිල්ලෑව ප්‍රදේශයේදී අණ නොතකා ධාවනය කළ ත්‍රිරෝද රථයකට පොලිසිය සිදුකළ වෙඩි තැබීමකින් පුද්ගලයන් දෙදෙනෙකු ජීවිතක්ෂයට පත්ව තිබේ.

මියගිය දෙදෙනා අතරින් එක් අයකු අපරාධවලට සම්බන්ධ අයකු බවට පොලිසිය සැකකරයි.

පොලීසිය පැවසුවේ, මොරගහහේන ටයර් කම්හල ආසන්නයේදී මෙම වෙඩි තැබීම සිදුව ඇති බවයි.

මීපේ දෙළුකැටිය පොලිස් මාර්ග බාධකයෙදී මෙම ත්‍රිරෝද රථයට නවතන ලෙස පොලිසිය අණ කළද ඔවුන් එම අණ නොතකා පොලිසිය දෙසට වෙඩි තබා පළාගිය බව පොලිසිය සඳහන් කරයි.

පසුව එම පොලිස් නිලධාරීන් ඒ බව අවට පොලිසිවලට දන්වා තිබේ.

ඉකුත් දා සිදුවූ වෙඩි තැබීමක් සම්බන්ධයෙන් විමර්ශනයක් සඳහා පැමිණ සිටි බස්නාහිර පළාත් අපරාද විමර්ශන කොට්ඨාසයේ නිලධාරීන් ඒ අතරතුර වහා ක්‍රියාත්මක වී ඇති අතර පැමිණි ත්‍රිරෝද රථයක් නවතන ලෙස අණ කර ඇතත් ඔවුන් පොලිසිය දෙසට වෙඩි තබා පළායාමට උත්සහා කර ඇත.

ඒ අවස්ථාවේ ඔවුන් ත්‍රිරෝද රථය හඹාගොස් වෙඩි තබා ඇති බව පොලිසිය කියයි.

වෙඩි තැබීම සිදුවන අවස්ථාවේ ත්‍රිරෝද රථය තුළ සිටි තවත් පුද්ගලයකු අසල පිහිටි රබර් වත්තකට පළාගොස් ඇති බව ද පොලිසිය පවසයි.

සිද්ධිය වූ ස්ථානය අසල වැටී තිබුණු පිස්තෝලයක් ද පොලිසියට හමුවී තිබේ.