එක්සත් අරාබි එමීර් රාජ්‍යයේ සිට ශ්‍රී ලංකාවට පැමිණෙමින් සිටි ශ්‍රී ලාංකිකයකුගේ ගමන් මල්ලක තිබූ රන් ආභරණ ඇතුළු භාණ්ඩ ගුවන් යානයේදී සොරකම් කළ බව කියන චීන ජාතිකයන් දෙදෙනෙකු අත්අඩංගුවට ගෙන ඇති බව වාර්තා වේ.

වාර්තා වන පරිදි සැකකරුවන් රුපියල් මිලියන 1.1 කට වඩා වැඩි වටිනාකමකින් යුතු දියමන්ති මුදු දෙකක්, රන් මාලයක්, රන් මුදුවක්, රන් පෙන්ඩනයක් සහ අත් ඔරලෝසුවක් ඇතුළු භාණ්ඩ ශ්‍රී ලාංකිකයාගෙන් සොරකම් කර ඇත.

මෙම ශ්‍රී ලාංකිකයා චීන ජාතිකයන් සමඟ අබුඩාබි සිට ඊයේ (ජුනි 23) ශ්‍රී ලංකාවට පැමිණ ඇති අතර, ඔහුගේ බෑගය ඔවුන් පැමිණි ගුවන් යානයේ අංක 09 ආසනයට ඉහළින් ඇති රඳවනයේ තබා ඇති බව පොලිස් පරීක්ෂණවලින් හෙළි වී තිබේ.

යානය ගොඩබාන අවස්ථාව වන විට ඔහුගේ භාණ්ඩ අස්ථානගත වී ඇති බව සොයා ගැනීමෙන් පසු ශ්‍රී ලාංකිකයා ඒ බව බලධාරීන්ට දන්වා ඇත.

පසුව එම ගුවන් යානයේ සියලුම මගීන් පරීක්ෂා කිරීමට පියවර ගෙන තිබේ.

එහිදී වයස අවුරුදු 31ක් සහ 36ක් වූ චීන ජාතිකයන් දෙදෙනා සන්තකයේ තිබී එම සොරාගත් භාණ්ඩ සොයාගෙන තිබේ.