කළුතර, ගමගොඩ ප්‍රදේශයේ නිවසකට පෙට්‍රල් බෝම්බ ප්‍රහාරයක් එල්ල කිරීමෙන් දරුවකු මිය යෑම සහ කාන්තාවකට තුවාල සිදු කිරීම සම්බන්ධයෙන් සැකකරුවන් දෙදෙනෙකු අත්අඩංගුවට ගෙන තිබේ.

කළුතර කොට්ඨාස අපරාධ විමර්ශන අංශයේ නිලධාරීන් විසින් අවුරුදු 23 සහ 25 යන වයස්වල පසුවන සැකකරුවන් අත්අඩංගුවට ගෙන ඇති අතර, ඔවුන් කළුතර දොඩන්ගොඩ සහ කෝන්ගොඩ ප්‍රදේශවල පදිංචිකරුවන් වේ.

ප්‍රහාරයට භාවිත කළ යතුරුපැදිය, තවත් පෙට්‍රල් බෝම්බයක් සහ ජංගම දුරකථන දෙකක් මොවුන් අත්අඩංගුවට ගැනීමේදී පොලිසිය සොයාගෙන ඇත.

ප්‍රහාරය සිදු කිරීම සඳහා පුද්ගලයන් දෙදෙනා රුපියල් 5000ක කොන්ත්‍රාත්තුවක් ලබාගෙන ඇති බව මූලික පරීක්ෂණවලින් හෙළි වී තිබේ.

මෙම පුද්ගලයන් දෙදෙනා 2025 මාර්තු 29 වැනි දින කළුතර ප්‍රදේශයේ නිවසකට පෙට්‍රල් බෝම්බයකින් පහර දී තිබිණි.

සිද්ධියෙන් 28 හැවිරිදි කාන්තාවක් තුවාල ලැබූ අතර, 06 හැවිරිදි පිරිමි ළමයකු රෝහලේ ප්‍රතිකාර ලබමින් සිට දින කිහිපයකට පසු මිය ගොස් තිබිණි.