කැනඩාවෙන් සහ මෙක්සිකෝවෙන් එක්සත් ජනපදයට ආනයනය කරන භාණ්ඩ සඳහා 25% ක තීරුබදු පැනවීම අනිවාර්යයෙන් ක්‍රියාත්මක කරන බව අමෙරිකානු ජනාධිපති ඩොනල්ඩ් ට්‍රම්ප් නිවේදනය කර තිබේ.

ඔහු පවසා ඇත්තේ, ඒ සම්බන්ධයෙන් රටවල් දෙක සමග ගනුදෙනුවකට එළඹීමට ලබා දී තිබූ කාලය අවසන් වී ඇති බවයි.

කැනඩාවට සහ මෙක්සිකෝවට 25% ක තීරුබදු පනවන බව ට්‍රම්ප් වසර මුල සිට අනතුරු අගවා තිබිණි.

ඔහු ජනාධිපති ධූරයට පත්වීමෙන් අනතුරුව තීරුබදු පැනවීම ප්‍රකාශයට පත්කළ අතර, ඒ සම්බන්ධයෙන් වන විධායක නියෝගය බලාත්මක වීමට නියමිතව තිබුණේ අද සිටය.

ඒ අනුව, පූර්ව ප්‍රකාශ පරිදි කැනඩාවෙන් සහ මෙක්සිකෝවෙන් එක්සත් ජනපදයට ආනයනය කරන භාණ්ඩ සඳහා 25% ක තීරුබදු පැනවීම ස්ථීර බව ට්‍රම්ප් ඊයේ නිවේදනය කර තිබේ.

ඊට ප්‍රතිචාර වශයෙන් අමෙරිකානු කොටස් වෙළඳපොළ ඊයේ පහතවැටී තිබූ බව විදෙස් ජනමාධ්‍ය වාර්තා කරයි.

චීන ආනයන සඳහා ද ට්‍රම්ප් ඊයේ අතිරේක 10% තීරුබද්දක් ප්‍රකාශයට පත්කර තිබේ.

ඒ අනුව, චීනයට ඉකුත් සතියේ පනවනු ලැබූ 10% ක තීරුබද්ද සමග මේ වනවිට බලාත්මක වන අතිරේක තීරු බද්ද 20% කි.

ට්‍රම්ප් පාලනය හමුවේ ඇමරිකාවේ ප්‍රමුඛතම වෙළඳ හවුල්කරුවන් තිදෙනාම වඩා ඉහළ වෙළඳ බාධකයකට මුහුණ දී සිටියි.

තීරුබදුවලට ප්‍රතිචාර වශයෙන් අමෙරිකාවට එරෙහිව දැඩි ප්‍රතිචාර දක්වන බව රටවල් තුනම පවසා ඇත.

ඒ හමුවේ, පුළුල් වන වෙළඳ යුද්ධයක් සම්බන්ධයෙන් අන්තර්ජාතික ආර්ථික විශ්ලේෂකයන් අනතුරු අගවා තිබේ.