හෙට (14) පැවැත්වීමට නියමිත පාර්ලිමේන්තු මහ මැතිවරණයට තරග කරන අපේක්ෂකයන් විසින් යොමුකරන ප්‍රවර්ධන කෙටි පණිවුඩ සම්බන්ධයෙන් ශ්‍රී ලංකා විදුලි සංදේශ නියාමන කොමිෂන් සභාව (TRCSL) විදුලි සංදේශ සේවා සපයන්නන්ගෙන් පැහැදිලි කිරීම් ඉල්ලා ඇති බව වාර්තා වේ.

මේ අතර, මැතිවරණ කොමිෂන් සභාව විදුලි සංදේශ නියාමන කොමිෂන් සභාව සමඟ සාකච්ඡා කර ඇති අතර, ඒ පිළිබඳ සොයා බලන ලෙස ඉල්ලා තිබේ.

පාර්ලිමේන්තු මැතිවරණ අපේක්ෂකයන් කිහිප දෙනෙකු විසින් මැතිවරණ ප්‍රචාරක කටයුතුවල කොටසක් ලෙස පසුගිය දින කිහිපය තුළ ජනතාව වෙත යොමුකළ ප්‍රවර්ධන කෙටි පණිවුඩ සම්බන්ධයෙන් ජංගම දුරකථන භාවිත කරන්නන් විවේචන එල්ල කර තිබේ.

ඒ අනුව මැතිවරණ කොමිෂන් සභාවේ මෙන්ම විදුලි සංදේශ නියාමන කොමිෂන් සභාවේ අවධානය ඊට යොමු කර ඇත.

විදුලි සංදේශ නියාමන කොමිෂන් සභාවේ ජ්‍යෙෂ්ඨ නිලධාරියකු පවසා ඇත්තේ විදුලි සංදේශ නියාමන කොමිෂන් සභාව විසින් මෙම ගැටලුව සම්බන්ධයෙන් සේවා සපයන්නන්ගෙන් පැහැදිලි කිරීම් ඉල්ලා සිටි අතර ඒ අනුව ඉදිරි ක්‍රියාමාර්ග ගන්නා බවයි.

බාහිර පාර්ශ්වවලට ජංගම දුරකථන අංක ලබා දී ඇත්තේ සේවා සපයන්නන් බවට මහජනතාවගෙන් එල්ල වන චෝදනාව සම්බන්ධයෙන් එම ජ්‍යෙෂ්ඨ නිලධාරියා පවසා තිබුණේ “සේවා සපයන්නන් කවදාවත් එහෙම කරන්නේ නැහැ. ප්‍රවර්ධන පණිවුඩ යැවීමට ජංගම දුරකථන අංක සොයා ගැනීමට තවත් බොහෝ මාර්ග තිබිය හැකියි. අපි දිනකට අපගේ ජංගම දුරකථන අංක කී දෙනෙක් සමඟ බෙදා ගන්නවාද? කොහොම වුණත් මේ ගැන සොයා බලනවා.” යනුවෙනි.

ප්‍රවර්ධන කෙටි පණිවුඩ සම්බන්ධයෙන් 2018 දී හඳුන්වා දුන් රෙගුලාසි මාලාවක් යාවත්කාලීන කිරීමේ ක්‍රියාවලියක විදුලි සංදේශ නියාමන කොමිෂන් සභාව මේ වන විට සිටින බව ද වාර්තා වේ.

“අපි 2018 දී ප්‍රවර්ධන කෙටි පණිවුඩ සම්බන්ධයෙන් සේවා සපයන්නන් වෙත රෙගුලාසි මාලාවක් හඳුන්වා දුන්නා. එම රෙගුලාසි ප්‍රමාණවත් නොවන බව පෙනෙන නිසා, අපි වඩාත් ශක්තිමත් රෙගුලාසි ගැසට් කිරීමට කටයුතු කරමින් සිටිනවා. එහෙම කළාම ජනතාව අපහසුතාවයට පත් වෙන්නේ නැහැ.” යනුවෙන් විදුලි සංදේශ නියාමන කොමිෂන් සභාවේ ජ්‍යෙෂ්ඨ නිලධාරියකු පවසා තිබේ.

මැතිවරණ කොමිසමේ සභාපති R. M. A. L. රත්නායක පවසන්නේ එවැනි ප්‍රවර්ධන කෙටි පණිවුඩ යැවීම වැරදි බවත්, මෙම ගැටලුව සම්බන්ධයෙන් මැතිවරණ කොමිසම විදුලි සංදේශ නියාමන කොමිෂන් සභාව සමඟ සාකච්ඡාවක් පවත්වා ඇති බවත්ය.

“මට පවා මේ පණිවුඩ ලැබෙනවා. මෙය සම්පූර්ණයෙන්ම වැරදියි. මෙය ආරම්භ වූයේ කොහෙන්දැයි සොයා බලා සුදුසු පියවර ගන්නා ලෙස අපි විදුලි සංදේශ නියාමන කොමිෂන් සභාව වෙත දැනුම් දුන්නා. අපි මේ ගැන විදුලි සංදේශ නියාමන කොමිෂන් සභාව එක්කත් සාකච්ඡා කළා. මෙය නැවැත්වීමට යම් යම් දුෂ්කරතා ඇති බව ඔවුන් පැවසුවා. කෙසේවෙතත් මේ සම්බන්ධයෙන් ක්‍රියාමාර්ග ගන්නවා,” යනුවෙන් ඔහු සඳහන් කර තිබේ.

ප්‍රවර්ධන කෙටි පණිවුඩ යනු නිෂ්පාදන, සේවා, සිදුවීම්, හෝ ව්‍යාපාර ප්‍රවර්ධනය කිරීම සඳහා ජංගම දුරකථන පරිශීලකයන්ට යවන කෙටි, ඉලක්කගත පණිවුඩ වේ.

මැතිවරණ සමයක මෙම පණිවුඩ මගින් ඡන්දදායකයන්ට අපේක්ෂකයන් විසින් ඔවුන්ගේ ප්‍රතිපත්ති හෝ ඡන්දයට අදාළ සිහිකැඳවීම් ලබා දීම, මහජනතාවට බලපෑම් කිරීමට ඉලක්ක කරයි.