ත්‍රිපෝෂ නිෂ්පාදනය සඳහා යොදාගන්නා අමුද්‍රව්‍යවල ඇති ඇෆ්ලැටොක්සින් මට්ටම් සංශෝධනය කිරීමෙන් පසු ත්‍රිපෝෂ අතිරේකය සැපයීම ලබන සතියේ සිට නැවත ආරම්භ කරන බව සෞඛ්‍ය ඇමැතිවරයා පසුගිය සතියේ ප්‍රකාශ කළේය.

“ඇෆ්ලැටොක්සින් අවසර ලත් මට්ටම සහිත අමුද්‍රව්‍ය තොග තොග අඩුවීම නිසා අවශ්‍ය ත්‍රිපෝෂ සැපයීමට අපට නොහැකි වුණා,” සෞඛ්‍ය ඇමැති වෛද්‍ය රමේෂ් පතිරණ බ්‍රහස්පතින්දා (30) පාර්ලිමේන්තුවේදී පැවසීය.

“අපි කලින් අවසර දුන් පරිදි ඇෆ්ලැටොක්සින් ප්‍රමාණය බිලියනයකට කොටස් 1ට වඩා අඩු විය යුතුයි. නමුත් ලෝක සෞඛ්‍ය සංවිධානය සහ ලෝක ආහාර වැඩසටහන දැන් එය සංශෝධනය කර තිබෙනවා බිලියනයකට කොටස් 10ක් සඳහා ඉඩදෙමින්. ඒ අනුව ලබන සතියේ සිට නැවතත් ත්‍රිපෝෂ ලබාදීම ආරම්භ කළ හැකියි” යැයි පතිරණ ඇමැතිවරයා පැවසීය.

ඇෆ්ලැටොක්සින් යනු බඩඉරිඟු , රටකජු, කපු ඇට සහ ගස් ගෙඩි වැනි කෘෂිකාර්මික භෝගවල දක්නට ලැබෙන ඇතැම් දිලීර මගින් නිපදවන විෂ වර්ගයකි.

ඉරිඟු ත්‍රිපෝෂවල ප්‍රධාන අමුද්‍රව්‍යයක් වේ.

පසුගිය සතියේ කැබිනට් මණ්ඩලය විසින් ආහාර අතිරේකවල ඇති අවසර ලත් ඇෆ්ලැටොක්සින් මට්ටම් B1 වර්ගයට ගැනෙන අහාර සඳහා 5ppb(ppb යනු බිලියනයකට කොටස් ) ලෙසත් සමස්තය සඳහා 10ppb ලෙසත් අනුමත කරන ලදී.

සෞඛ්‍ය අමාත්‍යංශය මගින් ක්‍රියාත්මක කරන මාතෘ හා ළමා සෞඛ්‍ය වැඩසටහන යටතේ මාස 6 සිට අවුරුදු 3 දක්වා අඩු පෝෂණ මට්ටමක් ඇති ළමුන් සඳහා අතිරේක ආහාරයක් ලෙසත්, ගැබිනි සහ කිරිදෙන මව්වරුන් සඳහා අතිරේක පෝෂකයක් ලෙසත් ත්‍රිපෝෂ ලබාදේ.

එහෙත් 1980 අංක 26 දරන ආහාර පනත යටතේ පවතින රෙගුලාසිවල නියම කර ඇති ඇෆ්ලැටොක්සින් සඳහා දැඩි අවසර ලත් සීමාවන් හේතුවෙන් ත්‍රිපෝසා නිෂ්පාදනය සඳහා බඩඉරිඟු මිලදී ගැනීම දුෂ්කර වී ඇති බව කැබිනට් ප්‍රකාශක ඇමැති ආචාර්ය බන්දුල ගුණවර්ධන පසුගිය සතියේ ප්‍රකාශ කළේය.

“එබැවින්, අන්තර්ජාතිකව පිළිගත් ආහාර අතිරේකවල B1 වර්ගය සඳහා 5ppb මට්ටම සහ 10 ppb මට්ටමේ සම්පූර්ණ ඇෆ්ලැටොක්සින් මට්ටම් යෙදීම සඳහා සෞඛ්‍ය ඇමැතිවරයා විසින් ඉදිරිපත් කරන ලද යෝජනාව ඇමැති මණ්ඩලය විසින් අනුමත කරන ලදී.” යැයි ගුණවර්ධන ඇමැතිවරයා ප්‍රකාශ කළේය.

ලෝක සෞඛ්‍ය සංවිධානයේ ඇෆ්ලැටොක්සින් නිර්දේශ 0.5 සිට 15 µg/kg පරාසයක පවතී (µg යනු කිලෝග්‍රෑම් එකකින් බිලියනයෙන් එකකි).

පතිරණ ඇමැතිවරයා මේ බව කියා සිටියේ රටේ ළමා මන්දපෝෂණය පිළිබඳ විපක්ෂ නායක සජිත් ප්‍රේමදාස සහ ජාතික ජන බලවේගයේ වෛද්‍ය හරිනි අමරසූරිය නැඟූ ප්‍රශ්නවලට පිළිතුරු දෙමිනි.

පතිරණ ඇමැතිවරයා පැවසුවේ, 2023 ජුනි මාසයේදී සිදු කරන ලද සමීක්ෂණයකට අනුව මන්දපෝෂණයෙන් පෙළෙන ළමුන් 15,763ක් මෙරට සිටින බවයි.

2022 වසරේ සිට මන්දපෝෂණයෙන් පෙළෙන දරුවන්ගෙන් සියයට දෙකක අඩුවීමක් දක්නට ලැබෙන අතර, එහිදී සමස්ත මන්දපෝෂණයෙන් පෙළෙන ළමුන් සංඛ්‍යාව 18,420ක්ව පැවතිණි.