ඉන්දියාව සහ ශ්‍රී ලංකාව අතර ඒකාබද්ධ ව්‍යාපාරයක් වන ට්‍රින්කෝ පෙට්‍රෝලියම් ටර්මිනල් ලිමිටඩ් යටතේ ත්‍රිකුණාමලය තෙල් ටැංකි සංකීර්ණය නැවත සංවර්ධනය කිරීම මගින් විදේශ විනිමය උපයා ගැනීමට රජය අපේක්ෂා කර තිබේ.

බලශක්ති ඇමැති ඉංජිනේරු කුමාර ජයකොඩි ත්‍රිකුණාමලය තෙල් ටැංකි සංකීර්ණයේ නිරීක්ෂණයක් සිදු කරමින් මේ සම්බන්ධයෙන් අදහස් පළ කළේය.

විදේශ විනිමය උත්පාදනය කිරීමට සහ ජාතික ආර්ථිකය ශක්තිමත් කිරීමට රජය දරන උත්සාහයක් ලෙස ඇමැතිවරයා එය පෙන්වා දුන්නේය.

ඇමැතිවරයාගේ කාර්යාලය නිවේදනයක් නිකුත් කරමින් කියා සිටියේ ලංකා අයිඕසී සහ ලංකා ඛනිජ තෙල් සංස්ථාව සමඟ සහයෝගීතාවයෙන් මෙම මධ්‍යස්ථානය ඉන්ධන ගබඩා කිරීමේ සහ බෙදා හැරීමේ මධ්‍යස්ථානයක් බවට සංවර්ධනය කිරීම අරමුණු කර ඇති බවයි.

බ්‍රිතාන්‍ය යුගයේ ටැංකි නවීන භාවිතය සඳහා ප්‍රතිසංස්කරණය කිරීම සඳහා සුළු අලුත්වැඩියාවන් සහ නල මාර්ග ස්ථාපනයන් ඇතුළුව දැනට සිදුවෙමින් පවතින ප්‍රතිසංස්කරණ කටයුතු ද මෙම සංචාරය අතරතුර ඇමැති ජයකොඩි විසින් නිරීක්ෂණය කරන ලදී.

මෙම වැඩිදියුණු කිරීම් මඟින් තෙල් ටැංකි සංකීර්ණයට ප්‍රවාහන, මහාමාර්ග, වරාය සහ සිවිල් ගුවන් සේවා අංශවලට සහාය වීමේ ප්‍රධාන අංගයක් ලෙස කටයුතු කිරීමට හැකි වනු ඇත.

මෙම සංකීර්ණය බාධාවකින් තොරව ඉන්ධන සැපයුම් දාමයකට ඒකාබද්ධ කරන බව ද ඇමැතිවරයාගේ කාර්යාලය නිකුත් කළ නිවේදනයේ සඳහන් වේ.

මෙම සංචාරයට සහභාගී වූ සිවිල් ගුවන් සේවා සහ වරාය නියෝජ්‍ය ඇමැති රුවන් ජනිත්, ලොව විශාලතම ස්වාභාවික වරායන්ගෙන් එකක් වන ත්‍රිකුණාමල වරායේ ගෝලීය වැදගත්කම සඳහන් කළේය.

තෙල් ටැංකි වරායේ මෙහෙයුම්වලට ඒකාබද්ධ කිරීම අන්තර්ජාතික නාවික කටයුතු සහ වෙළඳාමේ ප්‍රධාන අංගයක් ලෙස ශ්‍රී ලංකාවේ ස්ථානය ශක්තිමත් කරනු ඇතැයි ඔහු පැවසීය.

ද්විපාර්ශ්වික ගිවිසුමක කොටසක් ලෙස ට්‍රින්කෝ පෙට්‍රෝලියම් ටර්මිනල් ලිමිටඩ් විසින් මෙම සංකීර්ණයේ නැවත සංවර්ධනය කිරීමේ කටයුතු මෙහෙයවනු ලැබේ.

මෙම ව්‍යාපෘතිය, රටට සැළකිව යුතු ආර්ථික ප්‍රතිලාභ ජනනය කරන අතරම වරායේ ධාරිතාව ද වැඩි දියුණු කිරීමට අපේක්ෂා කරන බව බලශක්ති අමාත්‍යාංශය පවසයි.