November 17, 2024
රජයේ ඒකාබද්ධ අරමුදලට පරිබාහිරව අමාත්‍යාංශ, දෙපාර්තමේන්තු සහ රාජ්‍ය ව්‍යවසාය විසින් තබාගෙන ඇති අරමුදල් පිළිබඳ විස්තර භාණ්ඩාගාරය විසින් ඉල්ලා තිබේ.
භාණ්ඩාගාර ලේකම් මහින්ද සිරිවර්ධන අවධාරණය කර ඇත්තේ විශේෂිත තත්ත්වයන් යටතේ සහ පාර්ලිමේන්තුවේ පනතක් සම්මත කර ගැනීමෙන් මිස මහජන මුදල් එවැනි බාහිර අරමුදල්වල තබාගත නොහැකි බවයි.
ඒ අනුව ඔහු අමාත්‍යාංශ ලේකම්වරුන්ට, විශේෂ වියදම් ඒකක ප්‍රධානීන්ට, දෙපාර්තමේන්තු ප්‍රධානීන්ට, දිස්ත්‍රික් ලේකම්වරුන්ට, සංස්ථා, ව්‍යවස්ථාපිත මණ්ඩල, විශ්වවිද්‍යාල, උසස් අධ්‍යාපන ආයතන ඇතුළු රාජ්‍ය ආයතන ප්‍රධානීන්ට චක්‍රලේඛයක් නිකුත් කරමින් ඒ බව දැනුම්දී ඇත.
විවිධ පොදු ආයතන යටතේ ව්‍යවස්ථාපිත හා ව්‍යවස්ථාපිත නොවන අරමුදල් සැළකිව යුතු ප්‍රමාණයක් පවතින බව භාණ්ඩාගාරයට වාර්තා වී තිබේ.
රාජ්‍ය අංශයේ විවිධ අරමුදල් පිළිබඳ විස්තර එකතු කිරීමට පියවර ගෙන ඇත්තේ 2024 රාජ්‍ය මූල්‍ය කළමනාකරණ පනතේ අංක 44 හි 39 වැනි වගන්තිය යටතේ ප්‍රකාශිත ව්‍යවස්ථාපිත අරමුදල් පිළිබඳ විධිවිධානවලට අනුකූලව රාජ්‍ය අරමුදල් ක්‍රියාත්මක කිරීම විධිමත් කිරීමේ රජයේ වැඩපිළිවෙළේ කොටසක් ලෙසය.
එම පනතට අනුව, ඕනෑම ව්‍යවස්ථාපිත නොවන අරමුදලක් පනත ක්‍රියාත්මක වූ දින සිට නතර කළ යුතු අතර, එම දින සිට වසරක් ඇතුළත අරමුදල විසුරුවා හරිනු ලැබේ.
එහිදී එම අරමුදල සතු වූ මුදල් ඒකාබද්ධ අරමුදලට යොමු කළ යුතුය.
