රුපියල් මිලියන 6 ක් වටිනා විදේශීය ඉලෙක්ට්‍රොනික සිගරට් (ඊ-සිගරට්) ජාවාරම් කිරීම සම්බන්ධයෙන් 32 හැවිරිදි කාන්තාවක් බණ්ඩාරනායක අන්තර්ජාතික ගුවන්තොටුපළේ පොලිස් මත්ද්‍රව්‍ය නාශක අංශයේ නිලධාරීන් විසින් අත්අඩංගුවට ගන්නා ලදී.

පිළියන්දල, නාම්පමුණුව ප්‍රදේශයේ පදිංචි සැකකාර කාන්තාව සංචාරක නියෝජිතවරියක ලෙස සේවය කරන බව පැවැසේ.

ඇය ඊයේ සවස 7ට පමණ මැලේසියාවේ ක්වාලාලම්පූර් සිට ශ්‍රී ලංකන් ගුවන් සේවයේ UL-315 ගුවන් යානයෙන් බණ්ඩාරනායක අන්තර්ජාතික ගුවන්තොටුපළට පැමිණ තිබේ.

අදාළ කාන්තාව ගමන් මලු දෙකක සඟවා තිබූ ඊ-සිගරට් 455 ක් රැගෙන යමින් සිට ඇති අතර, ඒවා නිලධාරීන් විසින් සොයාගන්නා ලදී.

නීතිවිරෝධී ලෙස ඊ-සිගරට් තොගය රට තුළට ගෙන ආ මගියා වැඩිදුර විමර්ශන සඳහා යොමුකර ඇත.