October 14, 2024
පාර්ලිමේන්තු මැතිවරණ පනතට අනුව නාමයෝජනා භාරදීමට පෙර දේශපාලන පක්ෂවලට සංකේත වෙනස් කිරීමට මැතිවරණ කොමිෂන් සභාව අවසර ලබාදී තිබූ බැවින් ‘හංසයා’ ලකුණට හිමිකම් කියන නව ප්‍රජාතන්ත්‍රවාදී පෙරමුණ ‘ගෑස් සිලින්ඩරය’ ලකුණ තෝරාගැනීමට කටයුතු කර ඇති බව වාර්තා වේ.
මැතිවරණ දෙපාර්තමේන්තුවේ වෙබ් අඩවියේ පළ කර ඇති එම පක්ෂයේ සංශෝධිත ව්‍යවස්ථාවට අනුව පක්ෂයේ ලකුණ වන්නේ ‘හංසයා’යි.
පක්ෂ ව්‍යවස්ථාවට අනුව නැසීගිය ලලිත් ඇතුලත්මුදලිගේ දැක්ම සහ පරමාදර්ශයන් ප්‍රවර්ධනය කිරීම නව ප්‍රජාතන්ත්‍රවාදී පෙරමුණේ මූලික අරමුණයි.
නව ප්‍රජාතන්ත්‍රවාදී පෙරමුණ ප්‍රථම වරට මහජන අවධානය දිනා ගත්තේ 2010 දී එවක විශ්‍රාමික ජෙනරාල් සරත් ෆොන්සේකා ‘හංසයා’ ලකුණින් එහි ජනාධිපතිවරණයට තරග කළ අවස්ථාවේදීය.
එම අවස්ථාවේ ඔහු පරාජයට පත්වුවද 2015 ජනාධිපතිවරණයෙන් මෛත්‍රීපාල සිරිසේන ජයග්‍රහණය කළේ ‘හංසයා’ ලකුණ යටතේය.
එවක එක්සත් ජාතික පක්ෂ නියෝජ්‍ය නායක සජිත් ප්‍රේමදාස ද 2019 ජනාධිපතිවරණයට ඉදිරිපත් වූයේ නව ප්‍රජාතන්ත්‍රවාදී පෙරමුණ යටතේය.
ශ්‍රී ලංකා පොදුජන පෙරමුණේ කැරලිකාර කණ්ඩායම එකඟ වූයේ නම් එක්සත් ජාතික පක්ෂ නායක රනිල් වික්‍රමසිංහට පසුගියදා අවසන් වූ ජනාධිපතිවරණයේදී ‘හංසයා’ ලකුණින් තරග කළ හැකිව තිබූ බව දේශපාලන ආරංචි මාර්ග සඳහන් කරයි.
වික්‍රමසිංහ ස්වාධීන අපේක්ෂකයකු ලෙස තරග කළේය.
1993 වසරේ අප්‍රේල් මාසයේදී ඝාතනයට ලක්වූ ඇතුලත්මුදල්ගේ වරෙක සහකාරිය වූ එම්.එස්.ශ්‍යාමිලා පෙරේරා නව ප්‍රජාතන්ත්‍රවාදී පෙරමුණේ ලේකම්වරයා වන අතර උප සභාපතිවරියක් වන්නේ හිටපු ඇමැති රවී කරුණානායකගේ දියණිය වන ඔනෙලා කරුණානායකයි.
හිටපු අගමැති සහ මහජන එක්සත් පෙරමුණේ නායක දිනේෂ් ගුණවර්ධන නව ප්‍රජාතන්ත්‍රවාදී පෙරමුණේ ජාතික ලැයිස්තුවේ සිටී.
එම ලැයිස්තුවේ දෙවැනි තැන සිටින්නේ නව ප්‍රජාතන්ත්‍රවාදී පෙරමුණේ ලේකම් ශ්‍යාමිලා පෙරේරාය.
හිටපු පාර්ලිමේන්තු මන්ත්‍රී රවී කරුණානායක එම ලැයිස්තුවේ 10 වැනියායි.
ගුණවර්ධනගේ නායකත්වයෙන් යුත් ශ්‍රී ලංකා පොදුජන පෙරමුණේ කණ්ඩායම ජනාධිපතිවරණයේ දී රනිල් වික්‍රමසිංහගේ අපේක්ෂකයාට සහාය පළ කළේය.
වික්‍රමසිංහ ජනාධිපතිවරණයේදී ඡන්ද මිලියන 2.2කට වඩා වැඩි ප්‍රමාණයක් ලබාගෙන තුන්වැනි ස්ථානයට පත්විය.
මැතිවරණය අවසන් වූ වහාම එක්සත් ජාතික පක්ෂ නායකයා ප්‍රකාශ කළේ තමන් ඉදිරි පාර්ලිමේන්තු මැතිවරණයට ඉදිරිපත් නොවන බවයි.
