November 23, 2023
ශ්‍රී ලංකාවේ ඉහළ තනතුරු සඳහා නම් අනුමත කිරීමේදී ආණ්ඩුක්‍රම ව්‍යවස්ථා සභාව සිදුකරන ප්‍රමාදයන් පිළිබඳව සොයාබැලීමට පාර්ලිමේන්තු තේරීම් කාරක සභාවක් පත්කරන බව ජනාධිපති රනිල් වික්‍රමසිංහ අද නිවේදනය කළේය.
ජනාධිපතිවරයා මේ බව ප්‍රකාශ කළේ ශ්‍රී ලංකාවේ ඉහළ තනතුරු සඳහා නම් අනුමත කිරීමේදී ආණ්ඩුක්‍රම ව්‍යවස්ථා සභාව විසින් සිදුකරන ලද ප්‍රමාදයන් සම්බන්ධයෙන් පාර්ලිමේන්තුවේදී පැවැති දැඩි සාකච්ඡාවකින් අනතුරුවය.
මේ හේතුවෙන් ශ්‍රී ලංකාවට පොලිස්පතිවරයකු සහ විනිසුරුවරුන් නොමැතිවීම වැනි අර්බුදවලට මුහුණදීමට සිදුව ඇති බවත්, පොලිසියට සහ අධිකරණයට ක්‍රියාත්මක විය නොහැකි බවත් ඔහු වැඩිදුරටත් පැවැසීය.
අභියාචනාධිකරණ සභාපති විනිසුරු නිශ්ශංක බන්දුල කරුණාරත්න ශ්‍රේෂ්ඨාධිකරණයට පත්කිරීම සම්බන්ධයෙන් මතුව ඇති කරුණු පිළිබඳව අදහස් දක්වමින් ජනාධිපතිවරයා කියාසිටියේ, මෙම ප්‍රමාදයට හේතුව තමන් නොදන්නා බවයි.
“අගවිනිසුරුතුමා විසින් නම් කරන ලද නමක් තමයි මම ව්‍යවස්ථා සභාවට ඉදිරිපත් කළේ,” ඔහු පැහැදිලි කළේය.
ආණ්ඩුක්‍රම ව්‍යවස්ථා සභාවේ ඇතැම් මන්ත්‍රීවරුන් පාර්ලිමේන්තුවේ උත්සාහයන් කඩාකප්පල් කිරීමට කටයුතු කරන්නේ නම්, අවශ්‍ය තීන්දු තීරණ ගැනීමට නොහැකි බව ජනාධිපතිවරයා අවධාරණය කළේය.
එබැවින් ආණ්ඩුක්‍රම ව්‍යවස්ථා සභාවට අදාළ කරුණු විවාද කිරීම සඳහා පාර්ලිමේන්තු තේරීම් කාරක සභාවක් පත්කිරීමට තීරණය කළ බව ජනාධිපති රනිල් වික්‍රමසිංහ පැවසීය.
ආණ්ඩුක්‍රම ව්‍යවස්ථා සභාවට අදාළ කරුණු සම්බන්ධයෙන් ජනාධිපතිවරයා සහ විපක්ෂ නායක සජිත් ප්‍රේමදාස අතර ඉන් අනතුරුව දීර්ඝ සාකච්ඡාවක් පැවැත්විණි.
