05 ශ්‍රේණියේ ශිෂ්‍යත්ව උපකාරක පන්ති ගුරුවරියක් විසින් පෞද්ගලික උත්සවයක් සඳහා පොලිස් රථ භාවිත කළ බව පැවසෙන සිද්ධිය සම්බන්ධයෙන් පොලීසිය පරීක්ෂණයක් ආරම්භ කර තිබේ.

එම උත්සවයේ වීඩියෝවක් සමාජ මාධ්‍ය තුළ සංසරණයවීමත් සමග මේ සම්බන්ධයෙන් සමාජය තුළ දැඩි කතාබහක් මතුව තිබේ.

ඒ සම්බන්ධයෙන් කළ විමසීමකදී Newswire වෙත අදහස් දක්වමින් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග පවසා ඇත්තේ 05 ශ්‍රේණිය ශිෂ්‍යත්ව විභාගයෙන් සමත් සිසුන් ඇගයීමේ උත්සවයක් සඳහා අදාළ උපකාරක පන්ති ගුරුවරිය විසින් පොලිස් නිලධාරීන් සහ වාහන ඉල්ලා ඇති බවයි.

මෙම උත්සවයට සිසුන් 8000 කට සහ දෙමාපියන් 35,000 කට සත්කාරකත්වය සපයන බව ඇය ප්‍රකාශ කළ බවත්, ඒ නිසා ආරක්ෂක පියවර අවශ්‍ය වූ බවත් ඔහු පවසා තිබේ.

මෙම සිද්ධියට ළමයින් සම්බන්ධ නිසා ඉල්ලීම අනුමත කළ බවත් ඒ අනුව පොලිස් නිලධාරීන් 20 දෙනෙකු, පොලිස් යතුරුපැදි කිහිපයක් සහ පොලිස් මෝටර් රථයක් රුපියල් ලක්‍ෂ දෙකකට ආසන්න මුදලක් ගෙවීමෙන් අනතුරුව ලබා දුන් බවත් ඔහු පවසා ඇත.

එමෙන්ම පොලිස් මාධ්‍ය ප්‍රකාශකවරයා පවසා ඇත්තේ සම්පූර්ණ මුදල ගෙවීමෙන් අනතුරුව සේවාව ලබා දුන් බවයි.

කෙසේවෙතත් ජ්‍යෙෂ්ඨ පොලිස් අධිකාරී බුද්ධික මනතුංග පවසා ඇති පරිදි උපකාරක පන්ති ගුරුවරිය එම වාහන ඉල්ලා සිටි කාර්යයට යොදා නොගෙන ඇයගේ ප්‍රතිරූපය ඉහළ නැංවීම සඳහා යොදාගෙන තිබේ.

ඒ අනුව පොලිස් වාහන අවභාවිතය සම්බන්ධයෙන් ඇයට එරෙහිව පොලිස් පරීක්ෂණයක් ආරම්භ කර ඇති බවද ඔහු පවසයි.

පුද්ගලික පරිහරණය සඳහා පොලිස් වාහන භාවිත කළ හැකිදැයි කළ විමසීමකදී පොලිස් මාධ්‍ය ප්‍රකාශකවරයා පවසා ඇත්තේ ප්‍රවේශපත්‍ර ලබාගෙන පොදු කටයුතු සඳහා භාවිත කරන උත්සව සඳහා එනම් චිත්‍රපට රූගත කිරීම්, පෞද්ගලික සැණකෙළි සහ සංගීත සංදර්ශන, සුභසාධන සිදුවීම් යනාදී සිදුවීම් ශ්‍රී ලංකා පොලිසිය වාහන ලබාදෙන බවයි.

එමෙන්ම පොලිසියේ අතිරේක ආදායමක් ලෙස මෙය සිදුකරන බවත්, ලැබෙන ගෙවීම් රජයට පවරන බවත් ඔහු පවසා ඇත.

කෙසේ වෙතත්, පාසල්වලට අදාළ සිදුවීම්, සුබසාධන සහ ජාතික උත්සව සඳහා පොලිස් ආරක්ෂාව නොමිලේ සපයන බව පවසා ඇති පොලිස් මාධ්‍ය ප්‍රකාශකවරයා අවධාරණය කර ඇත්තේ පොලිස් වාහන කිසි විටෙකත් පුද්ගලයින්ගේ පුද්ගලික භාවිතය සඳහා ලබා නොදෙන බවයි.