ඔටිසම් ආබාධයෙන් පෙළෙන දරුවන්ගේ සංඛ්‍යාව වර්තමානයේ දිනපතා වැඩි වෙමින් පවතින බව රිජ්වේ ආර්යා ළමා රෝහලේ ළමා හා නව යොවුන් මනෝචිකිත්සක උපදේශක වෛද්‍ය ස්වර්ණා විජේතුංග පවසයි.

2009 දී ශ්‍රී ලංකාවේ සිදු කරන ලද සමීක්ෂණයකින් හෙළි වූයේ ළමුන් 93 දෙනෙකුගෙන් එක් අයකුට ඔටිසම් රෝගය ඇති බවයි.

ලෝක ඔටිසම් දැනුවත් කිරීමේ දිනය නිමිත්තෙන් සෞඛ්‍ය ප්‍රවර්ධන කාර්යාංශයේ පැවති මාධ්‍ය හමුවකට සහභාගී වෙමින් වෛද්‍ය ස්වර්ණා විජේතුංග මෙම අදහස් පළ කළාය.

තවදුරටත් අදහස් දක්වමින් ඇය පැවසුවේ, “2009 දී සිදු කරන ලද සමීක්ෂණයකින් ශ්‍රී ලංකාවේ ළමුන් 93 දෙනෙකුගෙන් එක් අයකුට මෙම තත්ත්වය ඇති බව පෙන්නුම් කළා. ඉන්පසුව, සමීක්ෂණය ක්‍රමානුකූලව සිදු කර නැහැ. දැන් එය නැවත ආරම්භ කර තිබෙනවා. අපට වෙනස් ප්‍රතිඵලයක් ලැබෙන්න පුළුවන්. ලොව පුරා මෙම තත්ත්වය වැඩිවන ප්‍රවණතාවක් පවතින නිසා ශ්‍රී ලංකාවේත් අප වෙත පැමිණෙන දරුවන්ගේ සංඛ්‍යාව දිනෙන් දින වැඩි වන බව අපට හැඟෙනවා.” යනුවෙනි.

තත්ත්වය මුලින්ම හඳුනාගැනීමේ වැදගත්කම වෛද්‍ය විජේතුංග අවධාරණය කළ අතර, ඔටිසම් රෝගය මුල් අවධියේදී හඳුනාගතහොත්, අවුරුදු දෙකහමාරක සිට පහ දක්වා කාලය තුළ මැදිහත්වීමෙන්, මෙම දරුවන්ගෙන් 90%කට සැළකිව යුතු ප්‍රගතියක් ලබා ගත හැකි බව පැවසුවාය.

මීට අමතරව, ළමා හා පවුල් සෞඛ්‍ය කාර්යාංශයේ ප්‍රජා සෞඛ්‍ය විශේෂඥ වෛද්‍ය ආසිරි හේවාමලගේ පෙන්වා දුන්නේ ඔටිසම් සහ අනෙකුත් ස්නායු ආබාධ සහිත දරුවන් හඳුනා ගැනීමේදී මාපියන්ගේ දායකත්වය ද අවශ්‍ය බවයි.