වෛද්‍ය ක්ෂේත්‍රයේ බුද්ධි ගලනය යළි ඉහළ යෑමත් සමග සෞඛ්‍ය අමාත්‍යාංශය මෙම කාරණය විසඳීමට විකල්ප නොමැතිව සිටියි.

මෙරට වෛද්‍යවරුන් 5,000කට ආසන්න සංඛ්‍යාවක් විදේශ රටවල වෛද්‍ය ප්‍රතිකාර සඳහා සුදුසුකම් ලබාගනිමින් විභාග සමත්ව තිබීම සෞඛ්‍ය අමාත්‍යාංශයේ ඉහළ බලධාරීන්ගේ කනස්සල්ලට හේතු වී තිබේ.

ශ්‍රී ලංකාව පුරා රජයේ සෞඛ්‍ය ආයතනවල දැනට වෛද්‍යවරුන් 20,000ක් පමණ සේවයේ යෙදී සිටින අතර ඒ අතරින්, සැලකිය යුතු සංඛ්‍යාවක් රටින් පිටව යාමේ තත්ත්වය බරපතළ අභියෝගයක් බවට පත්ව තිබේ.

තවද, බ්‍රිතාන්‍යයේ වෛද්‍ය වෘත්තීය සඳහා පුහුණුවීමට ඇති සූදානම තක්සේරු කරන PLAB විභාගයට පෙනීසිටි අපේක්ෂකයන් 3,500 න් 750 ක් පමණ ශ්‍රී ලංකාවෙන් එහි පැමිණි වෛද්‍යවරුන් බව වාර්තා වී තිබේ.

විභාගය සමත් වූ අයදුම්කරුවන් 2,100 න් 550 ක් ශ්‍රී ලාංකිකයන් වෙයි.

PLAB (වෘත්තීය සහ භාෂාමය ඇගයීම් මණ්ඩලය) විභාගය යනු බ්‍රිතාන්‍යයේ වෛද්‍ය විද්‍යාව ප්‍රගුණ කිරීම සඳහා එරටට පැමිණෙන විදේශීය වෛද්‍යවරුන් සමත් විය යුතු පරීක්ෂණයකි.

මේ සම්බන්ධයෙන් අදහස් දක්වමින් සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන පවසන්නේ, වෛද්‍යවරයකු සතු විශේෂඥ දැනුම මිල කළ නොහැකි බවයි.

එවැනි විශේෂඥ වෛද්‍යවරුන් විදේශගත වීම පිළිබඳව ඔහු දැඩි කනස්සල්ල පළකරයි.

“සැලකිය යුතු වෛද්‍යවරුන් සංඛ්‍යාවක් සහ තවත් සීමාවාසිකයන් පත්කිරීමට සැලසුම් කර තිබියදීත්, විශේෂඥයන් රට හැර යාමට තීරණය කිරීම අපගේ පාලනයෙන් ඔබ්බට ගිය දෙයක්,” ඔහු සඳහන් කරයි.

මේ අතර, රජයේ වෛද්‍ය නිලධාරීන්ගේ සංගමයේ මාධ්‍ය ප්‍රකාශක වෛද්‍ය චමිල් විජේසිංහ කියාසිටියේ මුල්‍ය දිරිගැන්වීම්, වැටුප් ක්‍රමය ප්‍රතිව්‍යුහගතකරණය කිරීම වැනි පියවර වෛද්‍යවරුන්ගේ බුද්ධි ගලනය අවම කිරීමට රජයට යෝජනා කළද එම යෝජනා ක්‍රියාවට නංවා නොමැති බවයි.

පසුගිය වසර දෙක තුළ විශේෂඥ වෛද්‍යවරුන් 400කට ආසන්න පිරිසක් රටින් පිටව ගොස් ඇති බවත් එය ශ්‍රී ලංකාවේ සෞඛ්‍ය ක්ෂේත්‍රයට දැවැන්ත ගැටලුවක් බවට පත්වෙමින් තිබෙන බවත් ඔහු පැවසුවේය.

ඊට ප්‍රතිචාර දක්වමින් සෞඛ්‍ය අධ්‍යක්ෂ ජනරාල්වරයා පවසන්නේ, රට ආර්ථික අර්බුදයෙන් යථා තත්ත්වයට පත්වෙමින් තිබෙන බැවින් වැටුප් වැඩිකිරීම මේ අවස්ථාවේ අභියෝගාත්මක බවයි.

“කෙසේවෙතත්, වැටුප් වර්ධක ද සැලකිල්ලට ගනිමින් මෙම ගැටළුව විසඳීමට අමාත්‍යාංශය උනන්දුවෙන් කටයුතු කරමින් සිටී” යැයි ඔහු වැඩිදුරටත් පැවසීය.