October 18, 2023
ශ්‍රී ලංකා ක්‍රිකට් ක්‍රීඩක ධනුෂ්ක ගුණතිලකට පනවා ඇති තාවකාලික තහනම ඉවත් කිරීමට ශ්‍රී ලංකා ක්‍රිකට් ආයතනයට නීතිමය බලයක් නොමැති බව ක්‍රීඩා ඇමැති රොෂාන් රණසිංහ ප්‍රකාශ කරයි.
පසුගිය වසරේ ඕස්ට්‍රේලියාවේ පැවැති විස්සයි විස්ස ලෝක කුසලාන තරඟාවලියේදී ලිංගික අපයෝජන චෝදනා එල්ල වූ ධනුෂ්ක ගුණතිලක, මාස 11ක නඩු විභාගයකින් අනතුරුව නිවැරැදිකරු බව තීන්දු කර සියලු චෝදනාවලින් නිදහස් විය.
ඔහු නිදහස් වීමෙන් පසුව, ශ්‍රී ලංකා ක්‍රිකට් නිවේදනය කළේ, ඕස්ට්‍රේලියාවේදී ධනුෂ්කට එරෙහිව එල්ල වූ අපරාධ චෝදනාවල බලපෑම විමර්ශනය කිරීම සඳහා ශ්‍රී ලංකා ක්‍රිකට් ආයතනය විසින් පත් කරන ලද ස්වාධීන පරීක්ෂණ කමිටුව, 2022 නොවැම්බර් මාසයේදී ඔහුට පනවා තිබූ තහනම සම්පූර්ණයෙන් ඉවත් කිරීමට නිර්දේශ කර ඇති බවයි.
ශ්‍රී ලංකා ක්‍රිකට් ආයතනයේ තීරණය සම්බන්ධයෙන් අදහස් දක්වමින් ක්‍රීඩා ඇමැති රොෂාන් රණසිංහ ජනමාධ්‍ය වෙත ප්‍රකාශ කළේ, මෙම කරුණ දැනට පවතින අධිකරණ ක්‍රියාමාර්ගවලට සම්බන්ධ බැවින්, එවැනි තීරණයක් ගැනීමට ශ්‍රී ලංකා ක්‍රිකට් ආයතනයට නීත්‍යනුකූල අයිතියක් නොමැති බවයි.
ජාතික ක්‍රීඩා සභාවේ නිර්දේශ අනුව, නීතිපතිවරයාගේ උපදෙස් මත සහ අධිකරණයට කරුණු ඉදිරිපත් කිරීමෙන් පසුව පමණක් තහනම ඉවත් කළ හැකි බව ක්‍රීඩා ඇමැතිවරයා පැවැසීය.
