ජාතික ලුණු සමාගමේ අලිමංකඩ ලුණු ලේවායෙන් නිකුත් කරන ලුණු නිෂ්පාදන ‘රජ ලුණු’ යන වෙළෙඳ නාමය යටතේ නිකුත් කිරීමට පියවර ගෙන තිබේ.

මෙම කර්මාන්ත ශාලාව විවෘත කිරීමත් සමඟ රජය ලුණු නිෂ්පාදනයේ ස්වයංපෝෂිතභාවය සඳහා සැළකිව යුතු පියවරක් තැබීය.

පසුගිය සෙනසුරාදා (29) පැවති සමාරම්භක උත්සවයේ ප්‍රධානත්වය කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති සහ ධීවර, ජලජ හා සමුද්‍ර සම්පත් අමාත්‍ය රාමලිංගම් චන්ද්‍රසේකර් යන මහත්වරුන්ගේ ප්‍රධානත්වයෙන් පැවැත්විණි.

නවීන තාක්‍ෂණයෙන් සමන්විත මෙම නව කර්මාන්ත ශාලාව මගින් පැයකට ලුණු ටොන් පහක් නිෂ්පාදනය කිරීමේ හැකියාව ඇති අතර, කිලෝග්‍රෑම් 1ක සහ ග්‍රෑම් 400ක මේස ලුණු පැකට් අඩුම මිලට වෙළඳපොළට නිකුත් කිරීමට නියමිතය.

දේශීය භාවිතය සහ අපනයන යන දෙකටම ලුණු නිෂ්පාදනය ඉහළ නැංවීම රජය අරමුණු කර තිබේ.

මෙමගින් උතුරු පළාතට සහ ඉන් ඔබ්බට අත්‍යවශ්‍ය ආර්ථික ශක්තියක් ලබා දෙමින් සෘජු හා වක්‍ර රැකියා 450ක් උත්පාදනය කිරීමට අපේක්ෂා කෙරේ.

2024 දී නිෂ්පාදනය කරන ලද ලුණු ටොන් 13,800ක් සමඟ, නිෂ්පාදන ප්‍රමාණය 2025 දී ටොන් 20,000 දක්වා වැඩි කිරීමට නියමිතය.

අලිමංකඩ ලුණු ලේවාය පුළුල් කිරීම උතුරු පළාතේ ආර්ථික ක්‍රියාකාරකම් ඉහළ නැංවීමට සහ සමස්ත ආර්ථික වර්ධනය ශක්තිමත් කිරීමට අපේක්ෂා කෙරේ.