විදුලි උත්පාදනය, සම්ප්‍රේෂණය සහ බෙදාහැරීම අධීක්‍ෂණය කිරීම සඳහා ලංකා විදුලිබල මණ්ඩලය රජය සතු ආයතන තුනකට වෙන්කළ යුතු බවට ශ්‍රී ලංකා විදුලිබල පනත සමාලෝචනය කිරීම සඳහා විදුලිබල හා බලශක්ති අමාත්‍යාංශය පත්කළ කමිටුව නිර්දේශ කර ඇතැයි විදුලිබල අංශයේ ප්‍රතිසංස්කරණ ලේකම් කාර්යාලයේ අධ්‍යක්ෂ ජනරාල් පුබුදු නිරෝෂන් පවසයි.

මෙය ලංකා විදුලිබල මණ්ඩලය ආයතන 12කට වෙන් කිරීමට දැනට පවතින ප්‍රතිපාදනයෙන් බැහැරවීමක් වන අතර ඉන් ඇතැම් කොටස් පෞද්ගලීකරණය කිරීමට නියමිතව තිබිණි.

ජනමාධ්‍ය වෙත අදහස් දක්වමින් පුබුදු නිරෝෂන් පවසන්නේ, විදුලිබල ක්ෂේත්‍රයේ සැලසුම්, ප්‍රසම්පාදන සහ ඉදිකිරීම් අධීක්ෂණය සඳහා රජය සතු ආයතනයක් ස්ථාපිත කරන බවයි.

ශ්‍රී ලංකා විදුලිබල පනත සමාලෝචනය කිරීම සඳහා විදුලිබල හා බලශක්ති අමාත්‍යාංශය විසින් පත්කළ කමිටුව ජනවාරි 20 වැනි දින පනතට අවශ්‍ය සංශෝධන පිළිබඳ අභ්‍යන්තර විමර්ශන වාර්තාවක් ප්‍රකාශයට පත්කළ බව ද ඔහු පෙන්වාදෙයි.

එමෙන්ම ඔහු පවසන්නේ, පාර්ශවකරුවන්ට සංකල්ප පත්‍රිකාව සම්බන්ධයෙන් පෙබරවාරි 14 වැනිදා දක්වා ලිඛිතව අදහස් ඉදිරිපත් කිරීමට අවස්ථාව ලබා දී ඇති බවයි.

විදුලිබල හා බලශක්ති අමාත්‍යාංශය, අංක 437, ගාලු පාර, කොළඹ 03 යන ලිපිනයට තැපැල් මගින් හෝ reforms@powermin.gov.lk ඔස්සේ විද්‍යුත් තැපෑලෙන් එම යෝජනා සහ අදහස් ඉදිරිපත් කළ හැකිය.

කමිටුවේ නිර්දේශ මත පදනම්ව පනත සඳහා ප්‍රධාන සංශෝධන තුනක් යෝජනා කර ඇති බව ද පුබුදු නිරෝෂන් ප්‍රකාශ කරයි.

ඔහු පෙන්වාදෙන්නේ, දැනට පනතේ සඳහන් වන්නේ, ලංකා විදුලිබල මණ්ඩලය වෙනම ආයතන 12 කට වෙන්කරන බවත්, ඉන් 3ක් රජය සතු බවත්, ඉතිරි 9 න් කිහිපයක් සම්පූර්ණයෙන්ම පෞද්ගලික සහ තවත් සමහරක් රාජ්‍ය-පෞද්ගලික හවුල්කාරිත්වයන් බවයි.

“කෙසේවෙතත්, නව ආණ්ඩුවේ බලශක්ති ප්‍රතිපත්තිය යටතේ, විදුලිය උත්පාදනය, සම්ප්‍රේෂණය සහ බෙදාහැරීම සඳහා වෙනම ආයතන තුනක් පිහිටුවන අතර, ඒවා සෑම විටම රජය සතු වනු ඇති. මීට අමතරව, විදුලිබල ක්ෂේත්‍රයට අදාළ සැලසුම්, ප්‍රසම්පාදන සහ ඉදිකිරීම් අධීක්ෂණය කිරීම සඳහා සම්පූර්ණයෙන්ම රජය සතු ජාතික ආයතනයක් ස්ථාපිත කරනවා. එමෙන්ම විදුලිබල මණ්ඩලයේ වත්මන් සහ විශ්‍රාමික කාර්ය මණ්ඩලය සඳහා EPF සහ ETF පහසුකම් ලබාදීම සඳහා රජයේ භාරයක් පිහිටුවනු ලබනවා” පුබුදු නිරෝෂන් පැවසීය.

එමෙන්ම ඔහු අනාවරණ කරන්නේ, විදුලිබල මණ්ඩලයේ දූෂණය පිටුදැකීම, සේවක අක්‍රමිකතා නැවැත්වීම සහ විදුලි බිල සැලකිය යුතු ප්‍රමාණයකින් අඩු කිරීම සම්බන්ධයෙන් දැනටමත් විදුලිබල පනතේ ප්‍රතිපාදන ඇතුළත් බවයි.

“කලාපයේ වැඩිම විදුලි බිලක් ගෙවන රට අපියි. දැනට විදුලි ඒකකයක සාමාන්‍ය මිල රුපියල් 39 ක්. එය රුපියල් 24 දක්වා අඩු කිරීම රජයේ අරමුණයි. ඉදිරි වසර 5 තුළ කලාපයේ වඩාත්ම දැරිය හැකි විදුලි ගාස්තු සහිත රට බවට ශ්‍රී ලංකාව පත්කිරීමට රජය අපේක්ෂා කරනවා.” යනුවෙන් ඔහු වැඩිදුරටත් ප්‍රකාශ කරයි.