ශ්‍රී ලංකාවේ දිගුකාලීන ජනන සැලැස්මට අනුව ශ්‍රී ලංකාවේ ගල් අඟුරු බලාගාර අක්‍රිය කරන බව ශ්‍රී ලංකාවේ විදුලිබල හා බලශක්ති ඇමැති කංචන විජේසේකර පවසයි.

2030 වන විට රටේ බලශක්ති අවශ්‍යතාවෙන් 70%ක් පුනර්ජනනීය බලශක්තිය හරහා ලබාගැනීම ශ්‍රී ලංකාව ඉලක්ක කර ඇති බව ඔහු පැවසීය.

ලෝක බැංකුව (WB), ආසියානු සංවර්ධන බැංකුව (ADB) සහ අනෙකුත් පාර්ශ්වකරුවන් සමඟ “Advancing Energy Transition” වටමේස සාකච්ඡාව ජනාධිපති රනිල් වික්‍රමසිංහගේ සහභාගිත්වයෙන් පසුගියදා පැවැත්විණි.

වැඩසටහන අතරතුරදී ඇමැති කංචන විජේසේකර දීර්ඝ කාලීන ජනන සැලැස්ම පිළිබඳව විස්තර කළේය.

2030 වන විට ශ්‍රී ලංකාව 70% පුනර්ජනනීය බලශක්තිය ළඟාකර ගැනීමේ අභිලාෂකාමී ඉලක්කයක් තබා ඇති බව ඔහු පැවසීය.

මෙම කැපවීම දේශගුණික විපර්යාසයන්ට එරෙහිව සටන් කිරීමට සහ කාබන් විමෝචනය අඩු කිරීමට ගෝලීය උත්සාහයන් සමඟ සමපාත වේ. 2050 වන විට කාබන් මධ්‍යස්ථභාවය අරමුණු කරගනිමින්, රටේ කැපවීම ජනාධිපති රනිල් වික්‍රමසිංහ ප්‍රකාශ කර ඇති බව ඇමැතිවරයා සඳහන් කළේය.

තිරසාර බලශක්ති භාවිතයන්හි පෙරමුණ ගැනීමට ශ්‍රී ලංකාවේ අධිෂ්ඨානය පෙන්නුම් කරමින් මෙම ඉලක්කය 2040 දක්වා ඉදිරියට ගෙනයෑම සඳහා සාකච්ඡා පවතින බව ඇමැති කංචන විජේසේකර පෙන්වා දුන්නේය.

රටේ පාරිසරික ප්‍රතිපත්තියේ කොටසක් ලෙස, ශ්‍රී ලංකාව නව ගල් අඟුරු බලාගාර කිසිවක් ක්‍රියාත්මක නොකරන අතර, පුනර්ජනනීය බලශක්ති භාවිතය, කාබන් මධ්‍යස්ථභාවය සහ පවතින ගල් අඟුරු බලාගාර ක්‍රියා විරහිත කිරීම යන මූලධර්ම ඒකාබද්ධ කරන පුළුල් දිගුකාලීන ජනන සැලැස්මක් රට විසින් සකස් කර ඇත.

දැනට ගල් අඟුරු භාවිතයෙන් ශ්‍රී ලංකාවේ ක්‍රියාත්මක වන ප්‍රධානම බලගාරයවන්නේ නොරොච්චෝලේ බලාගාරයයි.

ඇමැතිවරයා පවසන පරිදි ප්‍රධාන අභියෝගය වන්නේ 2030 වන විට දළ වශයෙන් මෙගාවොට් 4000 ක නව පුනර්ජනනීය බලශක්තියක් ජාතික විදුලිබල පද්ධතියට ඒකාබද්ධ කිරීමයි.

මෙයට පිළියම් යෙදීම සඳහා ශ්‍රී ලංකාව විශේෂයෙන් උතුර සහ නැගෙනහිර ප්‍රදේශවල පුනර්ජනනීය බලශක්ති කලාප හඳුනාගෙන ඇත.

ශ්‍රී ලංකාවේ අතිරික්ත බලශක්තිය අසල්වැසි රටවල් සමඟ බෙදාගැනීමේ ජනාධිපතිවරයාගේ දැක්ම ද ඇමැති කංචන විජේසේකර එහිදී පැහැදිළි කළේය.

කෙසේවෙතත්, මෙම ඉලක්කය සාක්ෂාත් කර ගැනීම සඳහා සැළකිව යුතු යටිතල පහසුකම් සංවර්ධනයක් අවශ්‍ය වන බව ද ඔහු පැවසීය.

ඉදිරි වසර හය තුළ ප්‍රධාන සම්ප්‍රේෂණ මාර්ග නවයක් ඒකාබද්ධ කිරීම ඇතුළුව උතුර හා නැගෙනහිර ප්‍රදේශවල යටිතල පහසුකම් සංවර්ධනය සඳහා ඇස්තමේන්තුගත ආයෝජනය දළ වශයෙන් ඩොලර් බිලියන 6 ක් වනු ඇති බව ද ඔහු පැහැදිලි කළේය.

මෙවැනි මහා පරිමාණ යටිතල පහසුකම් ව්‍යාපෘති සඳහා දැනට රජයට සම්පත් හිඟ වුවද, යෝජිත ප්‍රතිසංස්කරණ සම්ප්‍රේෂණ මාර්ග සංවර්ධනය සඳහා සුදුසු ආයෝජකයන් ආකර්ෂණය කර ගැනීම අරමුණු කර ගෙන ඇති බව ඇමැතිවරයා පෙන්වා දුන්නේය.

ශ්‍රී ලංකාවේ විදුලිබල ක්ෂේත්‍රය තුළ සම්ප්‍රේෂණ මාර්ග සංවර්ධනය සහ බෙදාහැරීම සම්බන්ධයෙන් රජයට ඒකාධිකාරයක් හිමිවේ.

යෝජිත ප්‍රතිසංස්කරණ මගින් මෙම අභියෝගයට මුහුණදීමටත්, පෞද්ගලික ආයෝජන සඳහා සුදුසු පරිසරයක් නිර්මාණය කිරීමටත් අපේක්ෂා කෙරේ.

මීට අමතරව ශ්‍රී ලංකා විදුලිබල පනත් කෙටුම්පත දෙවැනි වර කියවීමේ විවාදය ලබන බ්‍රහස්පතින්දා පැවැත්වීමට පාර්ලිමේන්තුවේදී රැස්වූ පක්ෂ නායකයන් තීරණය කර තිබේ.

තනි ආයතනයක් ලෙස ක්‍රියාත්මක වන විදුලිබල මණ්ඩලය වෙනම ආයතනවලට බෙදීමට, පෞද්ගලීකරණයට මංපෙත් විවර කිරීමට මෙම පනත් කෙටුම්පත යෝජනා කරයි.