හම්බන්තොට ප්‍රදේශයේ නවීනතම ඛනිජ තෙල් පිරිපහදුවක් සහ ඒ ආශ්‍රිත නිෂ්පාදන සැකසුම් මධ්‍යස්ථානයක් ඉදිකිරීම සඳහා චයිනා පෙට්‍රෝලියම් ඇන්ඩ් කෙමිකල් කෝපරේෂන් හෙවත් සිනොපෙක් සමඟ ගිවිසුම්වලට එළඹීමට අනුමැතිය ලබාගැනීම වෙනුවෙන් අවසන් කැබිනට් පත්‍රිකාව මැයි මාසයේදී කැබිනට් මණ්ඩලයට ඉදිරිපත් කිරීමට නියමිත බව වාර්තා වේ.

සිනොපෙක් යනු චීනයට අයත් පිරිපහදු සමාගමක් වන අතර විශාලතම ඛනිජ රසායනික නිෂ්පාදකයකු ද වේ.

දැනටමත් සෞදි අරාබියේ පිරිපහදු වත්කම් හිමිකරගෙන, රුසියාවේ පෙට්‍රෝ රසායනික නිෂ්පාදනයේ ද යෙදෙන සිනොපෙක් සමාගම ශ්‍රී ලංකාවේ පෙරළිකාර ව්‍යාපෘතියක් සඳහා ආයෝජනය කිරීමට නියමිත බව රජය ප්‍රකාශ කරයි.

හම්බන්තොට ප්‍රදේශයේ අපනයනය ඉලක්ක කරගත් ඛනිජ තෙල් පිරිපහදුවක් පිහිටුවීම සඳහා සුදුසුකම් ලත් ආයෝජකයන්ගෙන් කැමැත්ත ප්‍රකාශ කිරීමට විදුලිබල හා බලශක්ති අමාත්‍යංශය විසින් ආරාධනා කරන ලද්දේ පසුගිය පෙබරවාරි මාසයේදීය.

ඒ අනුව ආයෝජකයන් හත්දෙනකු සිය කැමැත්ත පළකළ අතර, ඉදිරිපත් කළ යෝජනා ඇගයීමෙන් අනතුරුව සවිස්තරාත්මක යෝජනා ඉදිරිපත් කිරීමට ආයතන දෙකක් සුදුසුකම් ලබා තිබිණි.

සිය සවිස්තරාත්මක යෝජනා ඉදිරිපත් කරන ලෙස එම ආයතන දෙකට 2023 ජුනි මාසයේදී දැනුම් දෙන ලදී.

කෙසේවෙතත්, එක් ආයතනයක් පමණක් සිය සවිස්තරාත්මක යෝජනාව ඉදිරිපත් කර තිබේ.

දැනට ව්‍යාපෘති කමිටුව සහ කැබිනට් මණ්ඩලය විසින් පත්කරන ලද සාකච්ඡා කමිටුව ආයෝජකයා සමඟ සාකච්ඡා කරමින් සිටී.

විදුලිබල හා බලශක්ති අමාත්‍යංශයේ ලේකම් සුලක්ෂණ ජයවර්ධන The Morning වෙත පවසා ඇත්තේ, ව්‍යාපෘතිය සඳහා යෝජනා කිහිපයක් පැමිණ ඇති අතර කැබිනට් මණ්ඩලය විසින් පත්කරන ලද සාකච්ඡා කමිටුව විසින් නියමයන් සහ කොන්දේසි සළකාබලා සමාගම් හතෙන් එකක් තෝරාගෙන ඇති බවයි.

“ඇගයුම් ක්‍රියාවලිය සිදුකර තිබෙනවා. අපි දැන් කොන්ත්‍රාත් ගිවිසුම්වල නියමයන් සහ අදාළ ප්‍රතිපාදන පිළිබඳව සාකච්ඡා කර සාකච්ඡා කරමින් සිටිනවා. ප්‍රතිපාදන කිහිපයක් හැර අනෙක් ඒවා බොහෝ දුරට අවසන් කර තිබෙනවා. අපි මහ බැංකුවෙන් සහ භාණ්ඩාගාරයෙන් ප්‍රතිපෝෂණ ලබා ගත යුතුයි. අපි සාකච්ඡා ක්‍රියාවලිය අවසන් කළ පසු නීතිපතිවරයාගේ අවසරය ලබාගෙන ගිවිසුම් අත්සන් කිරීමට කැබිනට් අනුමැතිය ලබාගත යුතු වනවා ,” යැයි සුලක්ෂණ ජයවර්ධන සඳහන් කර තිබේ.

“අපි අප්‍රේල් මාසය අවසන් වන විට සාකච්ඡා අවසන් කර මැයි මාසය අවසන් වන විට කැබිනට් අනුමැතිය සඳහා ගිවිසුම ඉදිරිපත් කිරීමට අපේ උපරිමය කරනවා. ගිවිසුම ක්‍රියාත්මක කර එහි එකඟතාව ලබාගැනීමට නීතිපති දෙපාර්තමේන්තුවට යම් කාලයක් ලබාදිය යුතුයි,” ලේකම්වරයා වැඩිදුරටත් පවසා ඇත.

ශ්‍රී ලංකාවේ යෝජිත පිරිපහදු ව්‍යාපෘතිය මගින් අවම වශයෙන් දිනකට බැරල් 100,000ක ධාරිතාවක් නිෂ්පාදනය කිරීමට අපේක්ෂිතය.

එහි ආයෝජනය ඩොලර් බිලියන 1.5-2ත් අතර පරාසයක පවතී.

ව්‍යාපෘතිය 2024 සිට 2027 දක්වා ක්‍රියාත්මක කිරීමට නියමිතය.

දේශීය වශයෙන් පිරිපහදු කළ පෙට්‍රෝලියම් නිෂ්පාදන ලබාගැනීමේ හැකියාව ඉහළ නැංවීම මගින් ශ්‍රී ලංකාවේ බලශක්ති සුරක්ෂිතතාව ඉහළ නැංවීම ව්‍යාපෘතියේ අරමුණයි.