අනවසර විදුලි රැහැනක පැටලී විදුලිසැර වැදීමෙන් මියගිය කලාවැව භරණ දළ ඇතා මිහිදන් කර වසර තුනකට පසු වනජීවී නිලධාරීන්ගේ අධීක්ෂණය යටතේ ඊයේ පස්වරුවේ යළි ගොඩගනු ලැබිණි.

ගල්කිරියාගම වනජීවී අඩවි ආරක්ෂක එච්.එම්.එස්. බණ්ඩාරගේ අධීක්‍ෂණය යටතේ මෙම ගොඩගැනීම සිදු කෙරිණි.

දෙස් විදෙස් සංචාරකයන් ආකර්ෂණය කරගැනීමේ පියවරක් ලෙස දළ යුගලය ඇතුළත් භරණගේ හිස කොටස සංරක්ෂණය කර මහජනතාවට ඉදිරිපත් කිරීමට වනජීවී සංරක්‍ෂණ දෙපාර්තමේන්තුව තීරණයකර තිබේ.

මෙම ඇතා කලාවැව අසල ගල්කිරියාගම රණව කන්ද රක්ෂිතයේ අනවසර විදුලි රැහැනක පැටලී ඝාතනයට ලක්වුණේ 2022 ජුලි 26 වැනි දිනයි.

සිරුර භූමදානය කිරීමට පෙර, දළ යුගලය සමඟ හිස ගල්කිරියාගම වනජීවී අඩවියේ වෙනම තැන්පත් කිරීමට දෙපාර්තමේන්තුව කටයුතු කළේ මහජන ප්‍රදර්ශනය සඳහා සහ සංරක්ෂණ කටයුතු සඳහා සංරක්ෂණය කිරීමේ අරමුණිනි.