උද්ධමනය පාලනය වීම සහ විදේශ විනිමය ගලා ඒම නැවත ක්‍රියාත්මක වීම ආදී හේතු නිසා වසරේ දෙවන භාගයේදී ආර්ථිකය බලාපොරොත්තු වූවාට වඩා වේගයෙන් යථා තත්ත්වයට පත් වනු ඇතැයි ශ්‍රී ලංකා මහ බැංකුව අපේක්ෂා කරයි.

2023 දී ආර්ථිකය සියයට 2.0 කින් හැකිළෙනු ඇතැයි මහ බැංකුව පුරෝකථනය කර ඇති අතර, වසරේ දෙවන අර්ධයේ වර්ධනය පළමු භාගයේ දක්නට ලැබුණු හැකිලීමෙන් වැඩි ප්‍රමාණයක් සමනය කරනු ඇතැයිද මහ බැංකුව පවසයි.

2023 පළමු කාර්තුවේදී ශ්‍රී ලංකා ආර්ථිකය සියයට 11.5 කින් තියුනු ලෙස හැකිළී ඇත.

“අප සතුව ඇති තොරතුරු මත පදනම්ව, වසරේ දෙවන භාගයේදී අපට අපේක්ෂිත වර්ධනයට වඩා ඉහළ වර්ධනයක් ලබා ගත හැකි යැයි අපි සිතනවා. දෙවන කාර්තුව අවසන් වූ පසු අපගේ වර්ධන ප්‍රක්ෂේපනය නැවත බැලීමට හැකි වනු ඇතැයි අපි සිතනවා”යැයි මහ බැංකු අධිපති ආචාර්ය නන්දලාල් වීරසිංහ පවසයි.

ගෝලීය ඉල්ලුම අඩුවීම හේතුවෙන් අපනයන ආදායමේ යම් තාවකාලික දුර්වලතාවයක් තිබියදීත්, රටින් පිටවී ගිය විදේශ මුදල් දැන් ආපසු ගලාඒමට පටන් ගෙන ඇති බැවින් ශ්‍රී ලංකාවේ ආර්ථිකයට හුස්මක් ලැබී ඇති බව මහ බැංකු අධිපතිවරයා පෙන්වාදෙයි.

එසේම, වසංගත සමයේදී සහ රුසියානු-යුක්රේන යුද්ධයේ ආරම්භයේ දී දක්නට ලැබුණු තියුණු අසමතුලිතතාවයකින් පසුව, සැපයුම් සහ ඉල්ලුම යන දෙකම සමානාත්මතාවයට පැමිණීම හේතුවෙන් ගෝලීය භාණ්ඩ මිල ගණන් අඩු වී ඇති බවත්, එහි ප්‍රතිඵලයක් ලෙස ගෝලීය වශයෙන් උද්ධමනය අඩුවෙමින් පවතින බවත් හෙතෙම වැඩිදුරටත් සඳහන් කරයි.