April 2, 2025
ප්‍රසිද්ධියේ අදහස් ප්‍රකාශ කිරීමේදී අසභ්‍ය සහ අශෝභන වචන භාවිත කිරීමෙන් වළකින ලෙස පූජ්‍ය රාජාංගණයේ සද්ධාරතන හිමියන්ට අවවාද කරමින් කොටුව මහේස්ත්‍රාත්වරයා අද දැනුම් දීමක් සිදුකර තිබේ.
එවැනි වචන භාවිතයෙන් වැළකිය යුතු බවට කොන්දේසි සහිතව ඇප ලබාදී තිබියදීත් උන්වහන්සේ දිගින් දිගටම නොගැලපෙන වචන ඇතුළත් ප්‍රකාශ සිදුකිරීම නිරීක්ෂණය කිරීමෙන් අනතුරුව කොටුව මහේස්ත්‍රාත් නිලුපුලි ලංකාපුර මෙම නියෝගය නිකුත් කළාය.
අපරාධ පරීක්ෂණ දෙපාර්තමේන්තුව සමඟ අගතියට පත් පාර්ශවය වෙනුවෙන් පෙනීසිටි ජනාධිපති නීතීඥ අනුර මැද්දගොඩ පෙන්වාදුන්නේ, උන්වහන්සේ අයත් රාමඤ්ඤ නිකායෙන් මීට පෙර උන්වහන්සේ ඉවත්කර ඇති බවයි.
එහෙත් නිකායේ අනුමැතියකින් තොරව උන්වහන්සේ සිවුරු පොරවාගෙන අඛණ්ඩව කටයුතු කරන බව පැවැසේ.
එහිදී මහේස්ත්‍රාත්වරිය පැවසුවේ, උන්වහන්සේ ඇප කොන්දේසි කඩකර ඇති බැවින් මෙම කඩකිරීම සම්බන්ධයෙන් රක්ෂිත බන්ධනාගාරගත කළ යුතු බවයි.
කෙසේවෙතත් අසභ්‍ය වචන භාවිත කිරීමෙන් වළකින ලෙසට තරයේ අවවාද කළ මහේස්ත්‍රාත්වරිය මුල් ඇප කොන්දේසි මත පූජ්‍ය රාජාංගණයේ සද්ධාරතන හිමියන්ව මුදාහැරියාය.
ආගමික සහජීවනයට බාධාවන ආකාරයේ ප්‍රකාශ නිකුත් කිරීම සම්බන්ධයෙන් රාජාංගනයේ සද්ධාරතන හිමියන් මීට පෙර
ද අත්අඩංගුවට ගෙන තිබිණි.
එහිදී උන්වහන්සේව රක්ෂිත බන්ධනාගාරගත කළ නමුත් පසුව ඇප ලබාදී ඇත.
අපරාධ පරීක්ෂණ දෙපාර්තමේන්තුව විසින් උන්වහන්සේව අත්අඩංගුවට ගෙන තිබුණේ පූජ්‍ය පාහියන්ගල ආනන්ද සාගර හිමියන් සිදුකළ පැමිණිල්ලකට අනුවය.
රටේ සමාජ සහ ආගමික සංහිඳියාවට අගතියක් වන ආකාරයේ ප්‍රකාශයන් සිදුකරන බවට පූජ්‍ය පාහියන්ගල ආනන්ද සාගර හිමියන්, පූජ්‍ය රාජාංගණයේ සද්ධාරතන හිමියන්ට චෝදනා එල්ලකර තිබේ.
