ආහාර, බෙහෙත්, ඉන්ධන සහ අත්‍යවශ්‍ය ආධාර සඳහා කළ උපකාරයට කෘතගුණ දැක්වීමක් වශයෙන් කිලිනොච්චියේ කාන්තාවක් තමාට තොප්පියක් පිරිනැමූ බවත් තමාට එහි වටිනාකම රුපියල් 100,000 ඉක්මවන බවත් ජනාධිපති රනිල් වික්‍රමසිංහ දඹදෙණියේ පැවති මැතිවරණ රැලියකට එක්වෙමින් පැවසීය.

“ජනතාවට කන්න, බෙහෙත්, පොහොර, ඉන්ධන, ගෑස් නැති වෙලා, ජීවත් වෙන්න සල්ලි නැතිවෙනකොට මට බලාගෙන ඉන්න බැරි වුණා. ඒ වෙලාවේ මම තීරණය කළා වගකීම භාරගෙන හොඳම දේ කරන්න. ජනතාවට අත්‍යවශ්‍ය ද්‍රව්‍ය සහ නිසි ආදායමක් නොමැතිව රට කඩාවැටෙන්න කිට්ටු වුණාම එම පියවර ගැනීම මගේ යුතුකම වුණා,” යනුවෙන් ජනාධිපතිවරයා සඳහන් කළේය.

“අවාසනාවකට මට වඩා ඉදිරියෙන් සිටි සමගි ජන බලවේගයේ ජනාධිපති අපේක්ෂක සජිත් ප්‍රේමදාස සහ ජාතික ජන බලවේගයේ ජනාධිපති අපේක්ෂක අනුර කුමාර දිසානායක පසුබැස ගියා. කිසිවෙක් ඉතුරු ඉතුරුවුණේ නැහැ. ඒ වන විට එක්කෙනෙක්වත් හිටියේ නැහැ. නමුත් වේදිකාවේ ඉන්න එක්සත් ජාතික පක්ෂය, ශ්‍රී ලංකා පොදුජන පෙරමුණ, ශ්‍රී ලංකා නිදහස් පක්ෂය වගේ අය මොන දේ වුණත් රට ගොඩගන්න මගේ පැත්තේ හිටියා.” යැයි ද ඔහු පැවසීය.

“රටේ කිසිවකුට ජීවත් වීමට ආහාර, බෙහෙත්, පොහොර හෝ ඉන්ධන තිබුණේ නැහැ. සියලු පක්ෂවල සාමාජිකයන්, වගකීම භාර ගැනීමට කැමති අයගේ සහයෝගය ඇතිව ජනතාවට උදව් කිරීම වැරදි වෙන්නේ කොහොමද? සජිත් ප්‍රේමදාස සහ අනුර කුමාර මුලින්ම කළේ මැතිවරණයක් ඉල්ලන එක.
නමුත් ජනතාව දුක් විඳිද්දී මැතිවරණයක් පැවැත්වීම සාධාරණ නැහැ. මැතිවරණයකට පෙර මිනිසුන්ට ජීවත් වීමට ආහාර සහ අනෙකුත් මූලික අවශ්‍යතා අවශ්‍යයි,” යනුවෙන් ජනාධිපතිවරයා පැවසීය.

“ඊට පස්සේ වෘත්තීය සමිති කිහිපයක් වැඩ වර්ජන දියත් කළා, ඔවුන් මට චෝදනා කළා රාජපක්ෂලා ආරක්ෂා කරනවා කියලා. මම රාජපක්‍ෂලා ආරක්‍ෂා කරනවා නම් ඒ අය මගේ රැලිවලට මාත් එක්ක එකතු වෙනවා. ඇත්තටම නාමල් රාජපක්ෂ වෙනත් වේදිකාවල කියලා තියෙනවා මම එයාලගේ පක්ෂය කඩන්න හදනවා කියලා. මම රාජපක්ෂලා ආරක්ෂා කළේ නැහැ. අපි ජනතාව ආරක්ෂා කළා. මෙම තොප්පිය එම කාන්තාව විසින් ලබා දෙන ලද්දේ ඔවුන්ට ජීවත් වීමට උපකාර කිරීමට අප ගන්නා උත්සාහයට ගෞරවයක් වශයෙන්. ඇය මට කිව්වා මේ කැප් එක දුන්නට මදි නමුත් මට ඡන්දය දෙනවා කියලා,” යැයි ඔහු වැඩිදුරටත් පැවසීය.