2024 අංක 8 දරන අධිකරණයකට, විනිශ්චය සභාවකට හෝ ආයතනයකට අපහාස කිරීම පිළිබඳ පනත සම්බන්ධයෙන් ශ්‍රී ලංකා නීතිඥ සංගමය කණස්සල්ල පළ කර ඇති අතර, මේ සම්බන්ධයෙන් ගත යුතු පියවර පිළිබඳ ඔවුන් දැනට සාකච්ඡා කරමින් සිටින බව වාර්තා වේ.

මාර්තු 28 වැනි දින සිදුවීමකින් පසු පුත්තලම මහාධිකරණ විනිසුරු නදී අපර්ණා සුවඳුරුගොඩ විසින් අධිකරණයට අපහාස කිරීමේ චෝදනාව මත පී. උදයංගනී නම් නීතිඥවරිය රක්ෂිත බන්ධනාගාර ගතකිරීමේ සිද්ධිය මෙහිදී පුළුල් සාකච්ඡාවකට තුඩු දී තිබේ.

මෙම සිද්ධිය සම්බන්ධයෙන් ශ්‍රී ලංකා නීතිඥ සංගමය අධිකරණ සේවා කොමිසමට පැමිණිල්ලක් ඉදිරිපත් කරන්නේ දැයි කළ විමසීමකට ශ්‍රී ලංකා නීතිඥ සංගමයේ සභාපති නීතිඥ රජීව් අමරසූරිය ප්‍රකාශ කර තිබුණේ ඊළඟ ක්‍රියාමාර්ගය තීරණය කිරීමට ඔවුන්ට තවත් දිනක් හෝ දෙකක් ගතවනු ඇති බවයි.

“ක්ෂණිකව ගැටලුව විසඳා තිබෙනවා, අදාළ නීතිඥවරිය නිදහස් කර යැවුනා. සියලු දෘෂ්ටි කෝණයන් සළකා බලා ඊළඟට ගත යුතු පියවර පිළිබඳ අපි දැන් තීරණය කරමින් සිටින්නේ,” යනුවෙන් අමරසූරිය පැහැදිලි කළේය.

එම නීතිඥවරිය රිමාන්ඩ් භාරයට පත් කරන ලද අධිකරණයකට හෝ විනිශ්චය සභාවකට අපහාස කිරීම පිළිබඳ පනත සම්බන්ධයෙන් නීතිඥ සංගමය ඉතා කණස්සල්ලට පත්ව සිටින බව ඔහු පැවසීය.

“(පුත්තලම) සිද්ධිය එවැනි එක් සිදුවීමක් පමණයි. අපි සමස්ත චිත්‍රය ආමන්ත්‍රණය කළ යුතුයි, එනම් මෙම පනතයි. එය කුරිරු නීති සම්පාදනයක්‍. ඒ සම්බන්ධයෙන් ගත යුතු පියවර මොනවාද සහ ඒ සම්බන්ධයෙන් අප ඉදිරිපත් කළ යුතු කරුණු මොනවාද යන්න අපි දැන් සළකා බලමින් ඉන්නේ.” යනුවෙන් ඔහු සඳහන් කර ඇත.

මාර්තු 28 වැනි දින සිදුවීමෙන් පසු විනිසුරු සුවඳුරුගොඩ විසින් අධිකරණයට අපහාස කිරීමේ චෝදනාව මත උදයංගනී රිමාන්ඩ් භාරයට පත් කරන ලදී.

චෝදනා පත්‍රයට අනුව, ඇය අධිකරණයට ඇතුළුවීමේදී හිස නැමීමට අපොහොසත් වූ බවත්, එය අගෞරවයක් ලෙස සළකනු ලැබූ බවත්, මාර්තු 7 වැනි දින චූදිතයකු වෙනුවෙන් පෙනී සිටියදී නිසි ගෞරවයකින් තොරව අධිකරණයට කතා කළ බවත් කියනු ලැබේ.

පුත්තලම මහාධිකරණය ඇයට ඇප ලබා දුන්නේ, පුත්තලම ප්‍රදේශයෙන් පදිංචි සහතිකයක් සහ රුපියල් මිලියන 2.5ක වත්කම් සහතිකයක් ඉදිරිපත් කළ හැකි ඇපකරුවන් දෙදෙනෙකු ඉදිරිපත් කිරීමේ කොන්දේසි යටතේය.

කෙසේවෙතත්, මෙම ඇප කොන්දේසි සපුරාලීමේ ප්‍රායෝගික දුෂ්කරතා පිළිබඳ අධිකරණයට දැනුම්දුන් අතර, ඇපකරුවන් ඉදිරිපත් කිරීම සඳහා හෝ පෞද්ගලික ඇප මත මුදා හැරීමට අවසර දීම සඳහා කාලය දීර්ඝ කරන ලෙස ඉල්ලීමක් කරන ලද අතර, එම මහාධිකරණ විනිසුරුවරිය එය ප්‍රතික්ෂේප කර තිබිණි.

පසුව අමරසූරිය විසින් ගොනු කරන ලද රිට් අයදුම්පතක් සළකා බලමින්, අභියාචනාධිකරණය අදාළ නීතිඥවරිය නිදහස් කිරීමට නියෝග කළේය.