ශ්‍රී ලංකාව ඇතුළු රටවල් 93ක සංචාරකයන්ට හෙට (ජූලි 15) සිට වීසා රහිතව ඇතුළු වීමට තායිලන්තය අවසර දී තිබේ.

ඒ අනුව වීසා බලපත්‍රයක් නොමැතිව ශ්‍රී ලාංකිකයන්ට තායිලන්තයට යෑමට හැකි පළමු අවස්ථාව මෙය වේ.

තායි ජාතිකයන්ට ඩොලර්10 සැකසුම් ගාස්තුවකට යටත්ව වීසා රහිතව දැනටමත් ශ්‍රී ලංකාවට පැමිණිය හැකිය.

තායිලන්තයේ අභ්‍යන්තර කටයුතු අමාත්‍යාංශය විසින් ප්‍රකාශයට පත් කරන ලද නව ප්‍රතිපත්තිය යටතේ වීසා රහිතව රැඳී සිටීමට හැකි කාලය දින 30 සිට 60 දක්වා දීර්ඝ කර ඇත.

එහෙත් සංචාරකයන් සතුව නවාතැන්, අරමුදල් සහ ආපසු පැමිණීමේ හෝ ඉදිරි ටිකට්පත් පිළිබඳ සාක්ෂි තිබිය යුතුය.

ගුවන්තොටුපළවල ආගමන විගමන නිලධාරීන්ගේ අභිමතය පරිදි ඇතුළුවීමට අවසර ලැබේ.

පවතින දත්ත අනුව වාර්ෂිකව තායිලන්තයට යන ශ්‍රී ලාංකිකයන් ගණන 350,000ක් පමණ වේ.

තායිලන්තයේ මේ වසරේ විදේශිකයන්ගේ පැමිණීමේ සියයට 35 කින් ඉහළ ගොස් ඇති අතර, මුළු සංචාරකයන් මිලියන 18.2ක් සහ බාට් බිලියන 858ක ආදායමක් (ඇමරිකානු ඩොලර් බිලියන 24 ක්) මෙම කාලය තුළ ඔවුන් උපයා ඇත.