අද (අගෝස්තු 01) වන විට ජනාධිපතිවරණය සඳහා අපේක්ෂකයන් දසදෙනෙකු ඇප මුදල් තැන්පත් කර ඇති බව මැතිවරණ කොමිෂන් සභාව නිවේදනය කරයි.

ඒ අනුව ජනාධිපති රනිල් වික්‍රමසිංහ, හිටපු පාර්ලිමේන්තු මන්ත්‍රී සරත් කීර්තිරත්න සහ කේ.කේ පියදාස ස්වාධීන අපේක්ෂකයන් ලෙස ඇප මුදල් තැන්පත් කර ඇති අතර සෙසු අපේක්ෂකයන් වන්නේ, හිටපු අධිකරණ අමාත්‍ය විජයදාස රාජපක්ෂ, අභිනව නිවහල් පෙරමුණේ ඕෂල හේරත්, ශ්‍රී ලංකා කම්කරු පක්ෂයේ ඒ.එස්.පී ලියනගේ, සමගි ජන බලවේගයේ සජිත් ප්‍රේමදාස, ජාතික සංවර්ධන පෙරමුණෙන් පී.ඩබ්ලිව්.එස්.කේ. බණ්ඩාරනායක සහ රුහුණු ජනතා පක්ෂයේ අජන්තා ද සොයිසා සහ සිරිතුංග ජයසූරිය එක්සත් සමාජවාදී පක්ෂයේ යි.

මැතිවරණ කොමිෂන් සභාව සඳහන් කළේ අගෝස්තු 15 වැනිදා දක්වා නාමයෝජනා භාරගන්නා බවයි.

මේ අතර මැතිවරණ කොමිසමේ සභාපති ආර්.එම්.ඒ.එල්. රත්නායක උපදෙස් දුන්නේ, අවසන් මොහොතේ ඇති විය හැකි ගැටළු වළක්වා ගැනීම සඳහා කළින් ඇප මුදල් තැන්පතු ඉදිරිපත් කරන ලෙසයි.

ජනාධිපතිවරණය 2024 සැප්තැම්බර් 21 වැනිදා පැවැත්වෙන බව මැතිවරණ කොමිසම නිල වශයෙන් නිවේදනය කළේය.