මහනුවර මධ්‍යම වෙළඳපොලේ කුඩා ආහාර වෙළඳසැලක් අසලින් ගමන් කරන මිනිසුන්ට පෙනෙන්නට ඇත්තේ, ඒ අසල මිනිසුන් සරල තේ කෝප්පයක් හෝ සිසිල් බීම වර්ගයක් භුක්ති විඳින බවයි.

කෙසේවෙතත්, හෝටලයේ හිමිකරුවා පොලිසියේ ග්‍රහණයෙන් බේරීම සඳහා තේ විකුණන මුවාවෙන් නීතිවිරෝධී ලෙස පෙරන ලද මත්පැන් විකුණන බව අනාවරණය වී ඇත.

තේ සහ සිසිල් බීම ලබාදෙන මුවාවෙන් නීතිවිරෝධී මත්පැන් අලෙවි කළ මෙම හෝටලයේ හිමිකරු සහ එහි සේවකයා මහනුවර කොට්ඨාශ මර්දන මර්දන ඒකකය විසින් ඊයේ අත්අඩංගුවට ගනු ලැබීය.

අත්අඩංගුවට ගන්නා අවස්ථාවේදී සැකකරුවන් සතුව නීතිවිරෝධී මත්පැන් බෝතල් අටක් තිබී ඇත.

තේ නිෂ්පාදකයාගේ කවුන්ටරයට අනුයුක්තව සේවය කරන වේටර්වරයකු මුදල් ගෙවා පාරිභෝගිකයාට තේ දෙන මුවාවෙන් නීතිවිරෝධී මත්පැන් සපයා ඇති බව විමර්ශනවලදී අනාවරණය විය.

හෝටලයේ හිමිකරු අම්පිටිය ප්‍රදේශයේ අයකු බවත් ඔහුගේ සේවකයා හිටපු සෙබළකු බවත් ඔවුන් දීර්ඝ කාලයක සිට මෙම ජාවාරම කරගෙන ගොස් ඇති බවත් පරීක්‍ෂණවලදී අනාවරණය විය.

ඔවුන් ඊයේ පස්වරුවේ මහනුවර මහේස්ත්‍රාත් අධිකරණයට ඉදිරිපත් කිරීමට නියමිතව තිබිණි.