November 4, 2024
2024 පාර්ලිමේන්තු මැතිවරණය නොවැම්බර් 14 වැනි දින පැවැත්වීමට ජාතික මැතිවරණ කොමිෂන් සභාව ගත් තීරණය අභියෝගයට ලක්කරමින් ගොනුකර තිබූ පෙත්සම ශ්‍රී ලංකා ශ්‍රේෂ්ඨාධිකරණය විසින් අද ප්‍රතික්ෂේප කරන ලදී.
නොවැම්බර් 14 වනදා මහමැතිවරණය පැවැත්වීමට මැතිවරණ කොමිසම ගත් තීරණය ආණ්ඩුක්‍රම ව්‍යවස්ථාව උල්ලංඝනය කිරීමක් බවට අධිකරණයෙන් නියෝගයක් නිකුත් කරන ලෙස ඉල්ලා මෙම පෙත්සම ගොනුකර තිබිණි.
ශ්‍රී ලංකා ශ්‍රේෂ්ඨාධිකරණය අද පෙත්සම විභාගයට නොගෙන නිෂ්ප්‍රභ කළේය.
පාර්ලිමේන්තු මැතිවරණ පනතේ දක්වා ඇති අවශ්‍ය ක්‍රියා පටිපාටි උල්ලංඝණය කර ඇති බව පවසමින් ‘අපි ශ්‍රී ලංකා’ සංවිධානයේ කැඳවුම්කරු ප්‍රියන්ත හේරත් විසින් ඔක්තෝබර් මාසයේදී මූලික අයිතිවාසිකම් පෙත්සම ගොනුකළේය.
බලධාරීන් විසින් නිසි පරිදි නාමයෝජනා කැඳවීම හෝ නීතිමය ප්‍රතිපාදනවලට අනුව මැතිවරණ දිනය නියම නොකළ බව පෙත්සමෙන් කියැවිණි.
කෙසේවෙතත්, මැතිවරණ දිනය ව්‍යවස්ථා විරෝධී බවට සමාජ මාධ්‍යවල පළවන ප්‍රකාශ මැතිවරණ කොමිසමේ ජනරාල් සමන් රත්නායක විසින් ප්‍රතික්ෂේප කර තිබිණි.
“ඔක්තෝබර් 11 වැනිදා නාමයෝජනා අවසන් වන අතර, එම දිනයේ සිට, නාමයෝජනා ඉදිරිපත් කරන දිනය ඇතුළුව, සති පහක පරතරයක් තිබිය යුතු බව නීතියේ සඳහන් වේ. මෙම දිනය නිවැරැදියි,” රත්නායක පැවසුවේ මැතිවරණ දිනය පිළිබඳ කනස්සල්ලට ප්‍රතිචාර දක්වමිනි.
