දැනට ස්ථාපිත බන්ධනාගාර සංකීර්ණවල පවතින ඉඩකඩ ප්‍රශ්නය විසඳීම සඳහා බස්නාහිර සහ දකුණු පළාත්වල ඉදිකිරීමට නියමිත නව බන්ධනාගාර සඳහා වන පිරිවැය මෙතෙක් ගණනය කිරීමට බන්ධනාගාර දෙපාර්තමේන්තුව කටයුතු කර නොමැති බව වාර්තා වේ.

බන්ධනාගාර දෙපාර්තමේන්තුවේ මාධ්‍ය ප්‍රකාශක ජී.දිසානායක ප්‍රකාශ කළේ නව බන්ධනාගාර දෙකක් විවෘත කිරීමට මේ වනවිට සාකච්ඡා කරමින් සිටින බවයි.

අධිකරණ අමාත්‍යංශයේ ඇති සංඛ්‍යාලේඛනවලට අනුව, පසුගිය වසර දෙක තුළ සිරකරුවන් සංඛ්‍යාව දෙගුණයක් වී ඇත.

2021 දී 16,000කට ආසන්නව සිටි සිරකරුවන් සංඛ්‍යාව පසුගිය වසර අවසන් වන විට 32,000කට ආසන්න සංඛ්‍යාවක් දක්වා ඉහළ ගොස් තිබේ.

මේ අතර වටරැක ප්‍රදේශයේ නව බන්ධනාගාර සංකීර්ණයක් ඉදිකිරීමේ සැලසුම්ද අත්හිටුවා ඇති බව දිසානායක පැවසීය.

“අපි අධිකරණ හා බන්ධනාගාර කටයුතු අමාත්‍යංශයට වාර්තාවක් ඉදිරිපත් කරලා තියෙනවා, තදබදය වැඩි නිසා අලුතින් බන්ධනාගාර ඉදිකිරීමේ අවශ්‍යතාවක් තියෙනවා කියලා. මෙම නව සංකීර්ණ දෙක සඳහා අපි බස්නාහිර සහ දකුණු පළාත් සළකා බලනවා,” ඔහු වැඩිදුරටත් පැවසීය.

දැඩි තදබදය හේතුවෙන් සිරකරුවන් සඳහා ඉඩක් සෙවීමේ මෙම උත්සාහය සිදුවන්නේ පසුගිය මාසයේ පොලිසිය විසින් ආරම්භ කරන ලද ‘යුක්තිය’ මෙහෙයුමේ පසුබිම තුළය.

බන්ධනාගාර දෙපාර්තමේන්තුව සඳහන් කරන්නේ පසුගිය සිකුරාදා (26) වන විට වරදකරුවන් වූ සහ වරදකරුවන් නොවූ රැඳවියන් 32,177ක් අත්අඩංගුවේ පසුවන බවයි.

එය රටේ බන්ධනාගාරවල මුළු ධාරිතාව මෙන් තුන් ගුණයකට ආසන්න වේ.

2020 දී හිටපු ජනාධිපති ගෝඨාභය රාජපක්ෂට වැලිකඩ බන්ධනාගාරයේ රැඳවියන් ඉඩකඩ මදි බව දැනුම් දීමෙන් පසු ඔහු වටරැක නව බන්ධනාගාරයක් ඉදිකරන ලෙස නියෝග කළේය.

එහි දැනටමත් එළිමහන් සිරකඳවුරක් සහ සුනීතා විද්‍යාලය ඇත.

කෙසේවෙතත්, නව බන්ධනාගාරය එහි ඉදිකර නොමැති බවත් එය “සැලැස්මක්” පමණක් බවත් දිසානායක පැහැදිලි කළේය.

මේ අතර, 2021 දී වැලිකඩ බන්ධනාගාරය හොරණ නව සංකීර්ණයකට ගෙන යෑමට සැලසුම් කර ඇති බව ප්‍රකාශ විය.

මෙම නව සංකීර්ණය මේ වසර වන විට අවසන් කිරීමට මුලදී සැලසුම් කර තිබුණද ප්‍රතිපාදන නොමැතිකම හේතුවෙන් එය ද නවතා දමා ඇති බව දිසානායක ප්‍රකාශ කළේය.

එහි රැඳවියන් 11,000කට නවාතැන් ගත හැකි අතර වැලිකඩ රැඳවියන් 7,000ක් පමණක් රඳවා තැබිය හැකිය.

හොරණ සංකීර්ණය සඳහා ඇස්තමේන්තුගත පිරිවැය දැන් සංශෝධනය කිරීමට සිදුවන බව ද ඔහු වැඩිදුරටත් ප්‍රකාශ කළේය.