ශ්‍රී ලංකාවෙන් ආනයනය කරන සියලුම නිෂ්පාදන සඳහා එක්සත් ජනපදය විසින් මෑතකදී සියයට 44ක තීරු බද්දක් පැනවීම පිළිබඳ කොළඹ රබර් වෙළඳුන්ගේ සංගමය දැඩි කනස්සල්ල පළ කරයි.

එම සංගමය පවසන්නේ එමගින් ශ්‍රී ලංකාවේ ස්වාභාවික රබර් කර්මාන්තයට ඇති කළ හැකි විනාශකාරී බලපෑම පිළිබඳ සමඟමය විශේෂයෙන් කණස්සල්ලට පත්ව සිටින බවයි.

රටේ ප්‍රධාන අපනයන අංශයක් ලෙස ස්වාභාවික රබර් කර්මාන්තය රැකියා සහ විදේශ විනිමය ඉපැයීම් යන දෙකටම සැළකිව යුතු දායකත්වයක් සපයනු ලැබේ.

වර්තමාන ගාස්තුව සියයට 12.5ක් වන බැවින්, අතිරේක සියයට 44ත් සමග මුළු තීරු බද්ද සියයට 56.5 දක්වා ඉහළ යන අතර එමඟින් ශ්‍රී ලංකා රබර් අපනයන එක්සත් ජනපද වෙළඳපොළ තුළ ඉතා තරඟකාරී නොවනු ඇත.

මෙය රබර් කිරි කපන්නන්, ඔවුන්ගේ පවුල් සහ ශ්‍රී ලංකාවේ පුළුල් ආර්ථිකයට දුරදිග යන බලපෑමක් ඇති කරනු ඇතැයි අපේක්ෂා කරන බව කොළඹ රබර් වෙළඳුන්ගේ සංගමය පැවසීය.

ශ්‍රී ලංකාවේ ස්වාභාවික රබර් අංශය රබර් කිරි කපන්නන්/අස්වැන්න නෙළන්නන් 150,000කට අධික සංඛ්‍යාවකට සහාය වන අතර ඔවුන්ගෙන් බොහෝ දෙනෙක් ග්‍රාමීය ප්‍රදේශවල සේවය කරති.

මෙම සේවකයන් සහ ඔවුන්ගේ පවුල්වල සාමාජිකයන් තම ජීවනෝපාය සඳහා කර්මාන්තය මත යැපෙන බව සංගමය පෙන්වා දුන්නේය.

එපමණක් නොව, රබර් කර්මාන්තය කුඩා පරිමාණ වතුකරයේ සිට මහා පරිමාණ අපනයනකරුවන් දක්වා විවිධ ව්‍යාපාර පරාසයක් ආවරණය කරන අතර, ඒ සියල්ල ක්ෂේත්‍රයේ වර්ධනය හා තිරසාරභාවය සඳහා වැදගත් කාර්යභාරයක් ඉටු කරයි.

එක්සත් ජනපදය විසින් පනවා ඇති සියයට 56.5ක තීරුබදු එරට ප්‍රධාන වෙළඳපොලේ ශ්‍රී ලංකා රබර් සඳහා ඇති ඉල්ලුම අඩු කිරීමට තර්ජනයකි.

2023 සහ 2024 දී, එක්සත් ජනපදය යැවූ ශ්‍රී ලංකාවේ ස්වාභාවික රබර් අපනයනවල වටිනාකම අමෙරිකානු ඩොලර් මිලියන 1.2කි.

සාපේක්ෂව, 2022 දී අපනයන අමෙරිකානු ඩොලර් මිලියන 1.9ක් වූ අතර එය රටේ විදේශ විනිමය ඉපැයීම් සඳහා කැපී පෙනෙන දායකත්වයක් ඉස්මතු කරයි.

කෙසේවෙතත්, මෙම තීරුබදු ක්‍රියාත්මක කිරීම එක්සත් ජනපද වෙළඳපොළේ ශ්‍රී ලංකා රබර්වල තරඟකාරිත්වය තවදුරටත් ඛාදනය කරනු ඇතැයි අපේක්ෂා කරන අතර එමඟින් අපනයන ආදායම අඛණ්ඩව පහත වැටෙනු ඇත.

“මෙම ගාස්තුවේ ප්‍රතිවිපාක රබර් අංශයෙන් ඔබ්බට විහිදේ. කර්මාන්තයේ කොඳු නාරටිය වන රබර් කිරි කපන්නන්, සමාගම් තරඟ කිරීමට අරගල කරන විට රැකියා අහිමි වීමේ අවදානමට මුහුණ දෙයි. බොහෝ රබර් කිරි කපන්නන්ට ජීවත් වීමට විකල්ප රැකියා අවස්ථා සීමිත වන අතර ඔවුන්ගේ පවුල් රබර් කිරි කැපීමෙන් උපයන ආදායම මත යැපෙයි. කර්මාන්තයේ පසුබෑමක් මෙම ප්‍රදේශවල ආර්ථික අර්බුදයකට තුඩු දිය හැකියි,” යනුවෙන් කොළඹ රබර් වෙළඳුන්ගේ සංගමය පැවසීය.

රජයේ කඩිනම් ක්‍රියාමාර්ග සහ පෞද්ගලික සහ රාජ්‍ය අංශ අතර ඵලදායී සහයෝගීතාවයෙන් ශ්‍රී ලංකාවට මෙම ගාස්තුවේ බලපෑම අවම කළ හැකි බව තමන් තරයේ විශ්වාස කරන බවකොළඹ රබර් වෙළඳුන්ගේ සංගමය පැවසීය.

“අපි තීරණාත්මක අවස්ථාවක සිටින අතර ක්ෂණික ක්‍රියාමාර්ග අත්‍යවශ්‍යයි. රජය සමඟ සහයෝගයෙන් කටයුතු කිරීමෙන්, රබර් කර්මාන්තයේ අවශ්‍යතා ආරක්ෂා කරන, රැකියා ආරක්ෂා කරන සහ මෙම අංශය අපගේ ආර්ථිකයට දායක වන වැදගත් විදේශ විනිමය ඉපැයීම් පවත්වා ගන්නා තිරසාර විසඳුම් සොයා ගැනීමට කොළඹ රබර් වෙළඳුන්ගේ සංගමය කැපවී සිටිනවා,” යනුවෙන් එහි සභාපති හරින් ද සිල්වා පැවසීය.